वैद्य पक्षया जनमुक्ति सेनाया कमाण्डरतय्सं खुगू बुँदे ज्ञापन पौ लःल्हात
माओवादी न्वकु मोहन वैद्य पक्षधर जनमुक्ति सेनाया कमाण्डरतय्सं सेना समायोजनया न्ह्यानाच्वंगु पुर्नवर्गीकरण प्रति असन्तुष्टि प्वंकूसें सेना समायोजन विशेष समिति सचिवालययात खुगू बुँदे ज्ञापन पौ लःल्हाःगु दु ।
जनमुक्ति सेनाया स्वंगूगु डिभिजनया सहकमाण्डर उदयबहादुर चलाउनेया नेतृत्वय् आइतवाः न्हय्गुलिं डिभिजनया कमाण्डरतय्सं मंकाः कथं ज्ञापन पौ लःल्हासें स्वेच्छिक अवकासय् वनीपिं लडाकुतय्त एकमुष्ट धेबा बिइमाःगु माग याःगु दु । जनमुक्ति सेनाया स्वंगूगु डिभिजनया सहायक कमाण्डर चलाउनेया कथं ज्ञापन पौलय् स्वेच्छिक अवकासय् वनीपिं लडाकुतय्त राष्ट्रिय सम्मान पत्रया व्यवस्था यायेमाःगु, घाःपाः योद्धातय्त विशेष सम्मान पत्रया व्यवस्थालिसे अवस्था स्वया वर्गिकृत यायेमाःगु, आजीवन उपचार लिसे निवृत्ति भरणया व्यवस्था यायेमाःगु लगायतया मागत दुथ्यागु जानकारी बियादिल ।
अथेहे ज्ञापन पौलय् घाःपाः लिसे अपाङगतय्त घाःपाः जूगु अवस्थाया प्रकृतिया आधारय् थप धेबा उपलब्ध यायेमाःगु, पूर्ण अपाङग लिसे अशक्ततय्गु निंतिं आवासया नापं व्यवस्था यायेमाःगु, स्वेच्छिक अवकासय् वनिपिंत बिइगु धेबा याकनं एकमुष्ट उपलब्ध यायेमाःगु लिसे सुत्केरी गर्भवती व मस्तय्गु निंतिं विशेष व्यवस्था यायेमाःगु माग नापं दुथ्याकातःगु दु ।
ज्ञापन पौलय् न्हापांगु डिभिजनया विग्रेड कमाण्डर बाबुराम किराती, निगूगु डिभिजनया कम्पनी कमाण्डर राजदेव रमन, स्वंगूगु डिभिजनया डिभिजन सह कमाण्डर उदय बहादुर चलाउने, प्यंगूगु डिभिजनया वटालियन कमाण्डर धन बहादुर पन्त, न्यागूगु डिभिजनया डिभिजन सह कमाण्डर रामलाल रोकामगर, खुगूगु डिभिजनया डिभिजन सहकमाण्डर नेप बहादुर कुंवर व न्हय्गूगु डिभिजनया वटालियन कमाण्डर प्रेम वयकपिंसं ल्हाःचिं तयादीगु दु ।
जनसेनाया न्हय्गुलिं डिभिजनया प्रतिनिधितय्सं लःल्हागु ज्ञापन पत्र लःल्हाना कयादिसें सेना समायोजन विशेष समिति सचिवालयया संयोजक बालानन्द शर्मां थुगु विषयलय् राजनीतिक तहपाखें हल मालेमाःगु प्रतिक्रिया बियादिल ।
