नेपाः व भारत दथुइ दोहोरो कर चीकेगु सम्झौताय् ल्हाःचिं
नेपाल व भारत दथुइ दोहोरो कर चीकेगु सम्वन्धि सम्झौताय् ल्हाःचिं त:गु दु । प्रधानमन्त्रीया ज्याकु सिंहदरवारय् जूगु छगू ज्याझ्वःया दथुइ निगू देय् दथुइ थुगु सम्झौता जूगु खः । नेपालपाखें अर्थमन्त्री बर्षमान पुन 'अनन्त' व भारतया अर्थमन्त्री प्रणव मुखर्जीं प्रधानमन्त्री डा. बाबुराम भट्टराईया ब्वतिइ सम्झौतापतिइ ल्हाःचिं तयादीगु खः ।
सम्झौतापतिइ ल्हाःचिं तयेधुंकाः सन् १९८७य् जूगु सम्झौता नं प्रतिस्थापन जूगु दु । थुगु सम्झौतापाखें नेपाः व भारत दथुइ थःथवय्या लगानी अप्वयेकेत ग्वाहालि जुइगु आशा याःगु दु ।
सम्झौतालिपा भारतया अर्थमन्त्री मुखर्जीं राष्ट्रपति डा. रामवरण यादवयात राष्ट्रपति निवासय् वनाः नापलानादीगु खः । थ्वस्वयां न्ह्यः प्रधानमन्त्री डा. बाबुराम भट्टराई व भारतया अर्थमन्त्री मुखर्जी दथुइ खँल्हाबल्हा जूगु खः । प्रधानमन्त्रीया ज्याकू सिंहदरवारय् जूगु वार्तालय् निगू पक्षया हीतया विषयसं सहलह जूगु खः ।
