म्याद थपया ई क्वःछिइत कार्यदल
प्रमुख प्यंगू राजनीतिक शक्तितय्सं लिप्पांगु खुसीइ संविधानसभाया म्याद थप यायेगु निंतिं छगू कार्यदल नीस्वंगू दु ।
सिंहदरवारस्थित शान्ति मन्त्रालयसं च्वंगु एनेकपा (माओवादी), नेपाली कांग्रेस, नेकपा (एमाले) व संयुक्त लोकतान्त्रिक मधेशी मोर्चा दथुइया मुँज्यां प्यम्ह दुजः दुगु कार्यदल नीस्वंगु खः । कार्यदलय् माओवादीपाखें पोष्टबहादुर बोगटी, कांग्रेसपाखें कृष्णप्रसाद सिटौला, एमालेपाखें ईश्वर पोखरेल व मोर्चापाखें जेपी गुप्ता दुजः कथं च्वनादीगु दु ।
फुक्कं पक्ष संविधानसभाया म्याद थप यायेगु पक्षय् दुगु खःसां छगू निश्चित अवधिया बारे सहमति मजुइवं कार्यदल नीस्वंगु खः । कार्यदलयात मंगलवाः सुथय्या दुने छगू निश्चित अवधिइ सहमति यायेत ई बिउगु खः । मुँज्याय् माओवादीं खुलाया ई थप यायेमाःगु खँ धाःगु खःसा कांग्रेस व एमालें स्वला जक थप यायेमाःगु बिचाः प्वंकूगु खः ।
सर्वोच्च अदालतं आः छक्व जक संविधानसभाया ई थप यायेफइगु आदेश बिइवं दलतय्सं गुलि ईया निंतिं म्याद थप यायेगु धकाः सहलह न्ह्याकूगु खः ।
