रेडियो मिर्मिरेया लुटय् याःगु ज्वलं लित बिइत महासंघया माग
नेपाल पत्रकार महासंघं रेडियो मिर्मिरेपाखें खुयाः यंकूगु प्रशारण उपकरण याकनं लित बिइत सम्बन्धित पक्षलिसे माग याःगु दु । रेडियो मिर्मिरेया प्रशारण उपकरण रेडियो सञ्चालक समितिया पुलांम्ह नायः विष्णु सापकोटा व पत्रकार महासंघ रेडियो मिर्मिरे प्रतिष्ठानया नायः श्रीधर न्यौपानेया नेतृत्वय् वःगु पुचलं असोज १५ गते बहनि वयाः लुटय् यानाः यंकूगु खः ।
रेडियोया ट्रान्समिटरया एक्साईडर, कम्प्युटर लिसे कम्प्युटरया हार्डडिक्स लगायत लुटय् यानाः यंकूगु रेडियो प्रशारण उपकरणत आःतक्क नं लित मब्यूनिगुलिं लुटय् यानाः यंकूगु ज्वलंत याकनं लित बिइत महासंघं सम्बन्धित पक्षलिसे इनाप याःगु खः । महासंघ केन्द्रीय समितिया शुक्रवाः च्वंगु स्वक्वःगु पूर्ण बैठकं रेडियो मिर्मिरेया प्रशारण उपकरण लुट प्रकरण बारे छानविन यायेत पत्रकार महासंघ प्रतिष्ठान शाखाया संयोजक बालकृष्ण बस्नेतया नेतृत्वय् स्वम्ह दुजः दुगु छानबिन समिति नीस्वंगु दु । छानविन समितिइ दामोदर तिम्सिना व राजेश मिश्रपिं दी ।
अथेहे महासंघं श्रमजीवी ऐन व न्यूनतम पारिश्रमिक लागू यायेत फुक्क सञ्चार गृहतय्त इनाप याःगु दु ।श्रमजीवितय्त शोषण यानाः कानुन पालना मयाइगु सञ्चार गृहयात कारवाही यायेत नं महासंघं माग याःगु दु । बैठकं सञ्चार गृह अनुगमनया नितिं महासंघ, प्रेस रजिष्ट्रार, प्रेस काउन्सिल व लगानीकर्ता दुगु समिति दयेकेत बः बिउगु दु । अथेहे महासंघं पत्रकार दथुइया आक्रमण व प्रशासनपाखें जूगु दमनप्रति नं च्यूताः नं प्वंकूगु दु ।
