'आः छक्वः जक संविधानसभाया म्याद थप यायेफइ'
सर्वोच्च अदालतं आः छक्वः जक संविधानसभाया म्याद थप यायेत आदेश बिउगु दु । अन्तरिम संविधानया धारा ६४ विपरीत संविधानसभाया म्याद थप यायेगु गैरसंवैधानिक व गैरकानुनी जूगु धासें अधिवक्ता बालकृष्ण न्यौपाने व भरतमणि जङ्गमं दायर याःगु रिटय् उगु फैसला न्यंकूगु खः ।
प्रधानन्यायाधीश खिलराज रेग्मी, न्यायाधीशत दामोदरप्रसाद शर्मा, रामकुमार प्रसाद शाह, कल्याण श्रेष्ठ व प्रेम शर्माया मंकाः इजलासं शुक्रवाः अन्तिम पटक थप याःगु इलय् नं संविधान निर्माणा मजूसाः जनमत संग्रह वा मेगू संविधानसभाया चुनावय् वनेत आदेश बिउगु दु । नापं सर्वोच्च अन्तिम पटक थप याइगु ईया दुने नं संविधान निर्माण मजूसाः संविधानसभा स्वतः विघटन जुइगुलिं वयां लिपा छु यायेगु धइगु बारे नं आः हे निर्णय यायेत नं धाःगु दु ।
