थनिंनिसें झिंखुन्हुन्यंकया लैंगिक हिंसा विरुद्धया अभियान न्ह्यात
थौं नोभेम्बर २५ तारिख । 'छेँ शान्ति हे विश्व शान्तिया आधार' धइगु नारालिसे झिंखुन्हुन्यंकया लैंगिक हिंसा विरुद्धया अभियान थनिंनिसें निसें न्ह्याःगु दु । लैंगिक हिंसा विरुद्धया झिंखुन्हुया अभियानया न्हापांगु दिं शुक्रवाः देय्न्यंक थीथी ज्याझ्वः यानाः हनाच्वंगु दु ।
अभियानया शुरुवात जूगु लसताय् मिसा समानता लिसे लैंगिक हकअधिकारया बारे ज्या याइगु सरकारी लिसे गैरसरकारी संघसंस्थातय्सं थीथी ज्याझ्वःया ग्वसाः ग्वयेत्यंगु दु । दिवसया लसताय् शुक्रवाः मिसा आयोगया ज्याकू भद्रकालीपाखें र्याली पिकायेत्यंगु दु ।
मिसा आयोगं सूचना मन्त्रालयलिसे समन्वय यानाः थीथी ज्याझ्वः यायेत्यंगु खः । शुक्रवाः मिसा आयोगया ज्याकुथिइ सनिलय् प्रधानमन्त्री भट्टराईं मिसा हिंसा सम्वन्धीया ज्याझ्वःया उलेज्या याइगु ज्याझ्वः दु ।
सन् १९६०या नोभेम्बर २५या दिं डोमिनिकन रिपब्लिकया तानाशाह राफेल लिओनिदास त्रुजिलो मोलिनां थः विरुद्ध आन्दोलन याःगु धासें मिराबल तता केहेँत प्याट्रिया मर्सिडिस, मारिया अजेन्टिना, मिनेरभा व एन्टोनिया मारिया टेरेसा मिराबलया हत्या याःगु खः ।
थुपिं हे स्वम्ह तता केहेँया हत्या जूगु दिंयात मिसा हिंसा विरुद्धया दिंया लुमन्तिइ अधिकारकःमितय्सं विश्वव्यापी दिवस हंगु व सन् १९९१ निसें संयुक्त राष्ट्र संघं नं मान्यता बिइधुंकाः थ्व अभियान अझ विश्वव्यापी जूगु खः । नेपालय् नं करिब झिदँ न्ह्यःनिसें मिसा हिंसाविरुद्वया झिंखुन्हुया अभियान न्ह्याकाः वयाच्वंगु खः ।
