राज्य पुनर्संरचना आयोगय् दलित समुदायपाखें छम्ह प्रतिनिधि तनीगु
राजनीतिक दलत दथुइ न्हय्गू बुँदे सहमतिया समिक्षा लगायतया विषयलय् सहलह यायेत विहीवाः च्वंगु प्रमुख स्वंगू दलया मुँज्यां राज्य पुनर्संरचना आयोगय् दलित समुदायपाखें छम्ह तनेगु सहमति याःगु दु ।
सिंहदरवारस्थित शान्ति मन्त्रालयसं च्वंगु मुँज्याय् न्हय्गु बुँदे सहमति कार्यान्वयन लगायत दलत दथुइ जूगु सहमति कार्यान्वयन लगायतया बिषयलय् सहलह जूगु जानकारी नेपाली कांग्रेसया उपसभापति रामचन्द्र पौडेलं बियादिल । शान्ति प्रक्रियाय् छुं प्रगति जुसां नं छेँबुँ लित बिइगु, वाइसीएलया संरचना भंग यायेगु, सत्य निरुपण लिसे मेलमिलाप आयोग नीस्वनेगु लगायतया बिषयलय् छु नं प्रगति जुइमफुगु निष्कर्ष मुँज्यां पिकागु पौडेलं धयादिल ।
दलत दथुइ वंगु कात्तिक १५ गते बहनि जूगु सहमतिइ जनसेनाया पुनःवर्गीकरण, कब्जा छेँबुँ लित बिइगु लगायतया ज्या मंसिर ७ गते तकया दुने क्वचायेकेगु न्ह्यःथनातगु खः ।
मुँज्याय् संविधानसभाया ई तनेगु बिषयलय् नं सहलह जूसां नं शुक्रवाः हाकनं मुँज्या च्वनाः जक थुगु बिषयलय् निर्णय कायेगु सहमति जूगु दु । मुँज्या लिपा संचारकर्मीतलिसे न्ववानादिसें नेकपा (एमाले)या नेता शंकर पोखरेलं न्हय्गु बुँदे सहमति कार्यान्वयनया समिक्षा यानाः जक संविधानसभाया ई तनेगु बिषयलय् निर्णय जुइगु जानकारी बियादिल ।
