कर पुलेगु वातावरण दयेकेत करदातातय्त स्कुल
वीरगंज (सन्ध्या टाइम्स) / सरकारं निर्धारण याःगु कर करदातातय्सं स्वेच्छिक रुपं पुलेगु कथंया वातावरण तयार यायेमाःगु खँ बाराया प्रमुख कर अधिकृत चेतनाथ दाहालं धयादीगु दु ।
करदातातय्त डर त्रास करं क्यंकेगु छलकपट व धरपकडं कर संकलन याये मजिउगु धासे। थज्याःगु ज्यापाखें कर संकलन यायेगु प्रथायात चिइकेमाःगु नं वय्कलं धयादीगु दु । थुकिया निंतिं वय्कलं थःगु हे पहलय् आन्तरिक राजस्व विभागयात नं जानकारी बियाः करदातातय्त छगू स्कुल संचालन यायेगु खँ धयादीगु दु ।
कर अधिकृत दाहालं थुकिया निंतिं थःगु ज्याकूया छकू क्वथाय् थुकथंया स्कुल संचालन यायेगु व इलय् व्यलय् करदातात भेला यानाः करया बारे सकतां कथंया जानकारी बीगु जुइ धयादिल ।
वय्कलं कर सम्बन्धी जानकरी बीगु उद्देश्यं चायेके-त्यनागु थुगु स्कुलय् कर पुलेमाःगुया दायित्व व कर चुहावट यायेगु नं अपराध यायेगु खः धइगु बारे विस्तृत रुपं जानकारी बियाः करदातातय्त शिक्षित यायेगु व उमिगु खुसिं क्वःछिउगु इलय् हे कर पुलेगु वातावरण तयार यायेगु जुइ धासें थ्व स्कुलं बीगु शिक्षा व जानकारी करदातातय्गु निंतिं तसकं प्रभावकारी जुइगु नं कनादीगु दु ।
'आधुनिक संसारया थ्व इलय् नेपाःया सन्दर्भय् कर प्रणालीया बारे करदातातय्त अव्यवहारिक ज्ञान बीफत धाःसा थुकिं उमित सम्मान याःगु जुइ' धयादिसें वय्कलं नेपालय् 'एकाउन्ट डिसिप्लेन' स्यंगु मदुनितर कर कार्यालयं आवश्यक दक्वं जानकारी कयाः करदातातय्त छुं हे जानकारी मबिसे छुं लेखा परीक्षकतय्सं गलत ढंगं लबः कयाच्वंगु द्वपं नं बियादीगु दु ।
राजस्वया कर्मचारी व करदाताया दथुया स्वापू नं बांलायेमाः धासें राजस्वया कर्मचारीं करदातातय्त ठगे यायेगु व कर चुहावट थेंजाःगु ज्याय् ग्वाहालि जुइगु ज्या मजुइमा धइगु ल्याखं हे थम्हं थुगु स्कुलया स्थापना याये त्यनागु व थुगु स्कुलया संचालनं करदातातय् दथुइ सकरात्मक हिउपाः वइगु नं वय्कलं दावी यानादीगु दु ।
आपालं करदातात कर व राजस्वया बारे अनभिज्ञ दु तप्यंक हे कर कार्यालयय् वयाः कर पु वइ धइगु अवस्था नं मदु उकिं करया बारे माःगु आवश्यक जानकारी बीगु कर्तव्य धइगु राजस्व संकलनया ज्याय् सक्रिय कर्मचारीतय्गु खः कर अधिकृत दाहालं धयादीगु दु ।
