आर्थिक समृद्धिया यात्रा सुरू जुल : प्रधानमन्त्री भट्टराई
प्रधानमन्त्री डा. बाबुराम भट्टराईं विहीवाः निसें आर्थिक समृद्धिया यात्रा न्ह्याःगु खँ धयादीगु दु । अर्थ मन्त्रालयसं विहीवाः जूगु छगू विशेष सहलह ज्याझ्वलय् प्रधानमन्त्री भट्टराईं शान्ति प्रक्रियां छगू गति कायेधुंकूगु व याकनं हे क्वचाइगु धयादिसें आर्थिक विकासया गतियात द्रुत गतिइ न्ह्यःने न्ह्याकेत निर्देशन बियादिल ।
वर्तमान सरकारया न्हापांगु प्राथमिकता शान्ति व निगूगु प्राथमिकता आर्थिक सम्बृद्धि जूगु धयादिसें वय्कलं आवंनिसें आर्थिक सम्बृद्धिया औपचारिक यात्रा न्ह्याःगु धयादिल । देय्या आर्थिक विकासया निंतिं दक्ष कर्मचारी दयेक दयेकं नं लक्ष्य कथंया सम्वृद्धि प्राप्त यायेमफुगु धयादिसें प्रधानमन्त्री भट्टराईं नीतिगत सुधार यानाः हे जूसां नं आः थप सशक्त ढंगं न्ह्यःने न्ह्याकेत अर्थमन्त्रालयया पदाधिकारीतय्त निर्देशन बियादिल ।
आयात अप्वः जुइगु राजश्व वृद्धिं देय्या अर्थतन्त्रय् सुधार मवइगु धयादिसें प्रधानमन्त्री भट्टराईं उत्पादन क्षेत्रय् आर्थिक लगानी यायेत सम्बद्ध पक्षयात इनाप यानादिल । सन् २०१२ व २०१३यात लगानी दँ घोषणा यायेगु योजना दुगु धयादिसें प्रधानमन्त्री भट्टराईं चांचां हिउपाः जुइफुगु धयादिल ।
ज्याझ्वलय् अर्थमन्त्री वर्षमान पुन 'अन्नतं' देय्या अर्थतन्त्रय् सन्तोषजनक सुधार वःगु धयादिसें लक्ष्य कथंया नीगू प्रतिशत स्वयाः अप्वः राजश्व संकलन जुइगु दाबी यानादिल ।
