आयोगय् दलिततय् प्रतिनिधित्व मदुगु धासें सभासद्तय् आपत्ति

व्यवस्थापिका संसद अन्तर्गत थीथी दलया दलित सभासद्तय्सं राज्य पुनर्संरचना आयोगय् दलिततय् प्रतिनिधी मःतगु धासें सरकार व प्रमुख दलतय्त कुंखिंउगु दु । व्यवस्थापिका संसदया विहीवाःया मुँज्याय् न्वंवासें सभासद्तय्सं आयोगय् दलितयात प्रतिनिधित्व मयाकूसा संसद न्ह्याके मबीगु नापं ख्याच्वः बिउगु खः ।

मुँज्याय् न्ववानादिसें माओवादी सभासद तिलक परियारं सरकारं छुं ई न्ह्यः नीस्वंगु राज्य पुनर्संरचना आयोगय् दलिततय्त दुमथ्याकुगुप्रति विरोध यानादिसें सरकार व आयोगय् दलितया उचित प्रतिनिधित्व मयाकूसा संसद न्ह्याके मबीगु ख्याच्वः बियादिल । नेकपा (एमाले)या छविलाल विश्वकर्मां आयोगय् दलितया प्रतिनिधित्व मयाकूसाः आन्दोलनय् कुहांवयेगु ख्याच्वः बियादिल ।

अथेहे दलित जनजाति पार्टीया विश्वेन्द्र पासवानं सरकारय् दलिततय्त दुमथ्याकुगु व राज्य पुनर्संरचना आयोगय् नं दलितया मनोनयन मयागुप्रति असहमति प्वंकादिल । नेकपा (माले)या सिपी मैनालीं नं दलितया प्रतिनिधित्व जुइमफुगु छ्यं बिनाया आयोगय् विज्ञतय्सं थाय् मदुगु खँय् दुःख जूगु धयादिल ।

राष्ट्रिय जनशक्ति पार्टीया सहअध्यक्ष डा. प्रकाशचन्द्र लोहनीं राज्य पुनर्संरचना आयोगय् एनजिओ, आइएनजिओ व पिएचडीया विद्यार्थीतय्त दुथ्याकूगुलिइ कुंखिनादिल । नेमकिपाया लिला न्याइच्याईं राज्य पुनर्संरचनाया निंतिं विज्ञ समूह दयेकेगु विधेयक सरकारं लित कागुलिं सरकार अल्पमतय् लायेधुंकूगु धयादिसें उगु हे आधारय् वर्तमान सरकारं राजीनामा बिइमाःगु धयादिल । नेकपा संयुक्तया चन्द्रदेव जोशीं आयोग नीस्वनेगु प्रक्रियाप्रति असहमति प्वंकूसें येँय् मचाया अपहरण व हत्याय् ल्हाःदुपिं मनूतय्त छुटय् यायेत सरकारया मन्त्री लिसे नेतातय्सं दवाब बिइगु नाजायज ज्या जुयाच्वंगु धयादिल ।

नेपाली कांग्रेसया खड्गबहादुर बस्यालं देय्या शान्ति सुरक्षाया स्थिति स्यनाः वनाच्वंगु धयादिसें सरकारं सुरक्षा बिइमफुगु द्वपं बियादिल ।