झिंस्वंगू विद्यार्थी संगठनं शिक्षामन्त्रीया ध्यानाकर्षण
थीथी झिंस्वंगू विद्यार्थी संगठनतय्सं थःम्हं तयाः वयाच्वंगु थीथी मागप्रति शिक्षामन्त्री दीनानाथ शर्माया ध्यानाकर्षण याकूगु दु । थीथी झिंस्वंगू विद्यार्थी संगठनया प्रतिनिधितय्सं विहीवाः सामुहिक रुपय् शिक्षामन्त्री शर्मायात नापलानाः थःपिनिगु मागया बारे ध्यानाकर्षण याकूगु खः ।
नेपाल विद्यार्थी संघया न्वकु नयनसिंह महरं न्हापांनिसें थःपिंसं ल्ह्वनाः वयाच्वनागु शिक्षाक्षेत्र सुधार लगायत थीथी मागया बारे मन्त्रीया ध्यानाकर्षण याकूगु जानकारी बियादिल । त्रिभुवन विश्वविद्यालयपाखें प्रविणता प्रमाणपत्र तह चीकेवलय् सरकारं याःगु प्रतिवद्धता कार्यान्वयन यायेत विद्यार्थी संगठनतय्सं दवाब बिउगु खः ।
प्रत्येक निर्वाचन क्षेत्रय् म्होतिं नं छगू उच्च मावि व जिल्लाय् विज्ञान विषय ब्वंकीगु उच्च मावि चायेकेगु ज्या पूवंकेत विश्वविद्यालयसं पदाधिकारी नियुक्ति, संविधानं क्वःछिउगु कथंया निःशुल्क शिक्षाया ग्यारेन्टी, न्हूगु चायेकूगु विश्वविद्यालययात सरकारी अनुदान बिइमाःगु, शिक्षा क्षेत्रय् बजेट अप्वयेके माःगु लगायतया मागत झिंस्वंगू विद्यार्थी संगठनतय्सं तयाः वयाच्वंगु दु ।
अथेहे खाद्यवस्तु, ग्यास व मचिकं सुपथ भावं बिइत विद्यार्थीतय्त कार्डया व्यवस्था लिसे सार्वजनिक यातायातय् न्यय्गू प्रतिशत भाः छ्यापंया व्यवस्था दयेमाःगु माग नं विद्यार्थीतय्सं तःगु खः ।
