सशस्त्र पुचलं ल्वाभः सरकारयात लःल्हायेगु सहमति

तराईलय् सशस्त्र संघर्ष यानाः वयाच्वंगु संयुक्त जनतान्त्रिक तराई मुक्ति मोर्चां सरकारयात ल्वाभः लःल्हाइगु जूगु दु । मोर्चालिसेया शान्ति लिसे पुर्ननिर्माण मन्त्रालयसं विहीवाः जूगु वार्ताय् मोर्चां ल्वाभः लःल्हायेगु सहमति याःगु खः । वार्ताय् सरकार व मोर्चाया दथुइ न्यागू बुँदे सहमति जूगु दु । सहमति कथं मोर्चालिसे दुगु ल्वाभः पुस ५ गते सरकारयात लःल्हायेगु, मोर्चाया ज्वंपिं कार्यकर्तातय्त त्वःतेगु प्रक्रिया न्ह्याकेगु लगायत नितीगत विषयलय् सहलह यानाः न्ह्यःने न्ह्यायेगु सहमति जूगु दु । वार्ताय् शान्ति लिसे पुर्ननिर्माण मन्त्री सत्य पहाडी, सचिव धु्र्वप्रसाद शर्मा, प्रधानमन्त्री ज्याकूया प्रतिनिधि व गृह मन्त्रालयया प्रतिनिधिया नं ब्वति दुगु खः । मोर्चायापाखें नायः साजय कुमार गुप्ता 'कौटिल्य'लिसेया न्याम्हसिया वार्ता पुचःया ब्वति दुगु खः ।