सूर्य नेपाल गार्मेन्ट चाल
येँ (सन्ध्या टाइम्स) / वंगु छुं दिं न्ह्यःनिसें बन्द जुयाच्वंगु विराटनगर स्थित सूर्य नेपाल गार्मेन्ट शुक्रवाः निसें संचालनय् वःगु दु । ब्यवस्थापन पक्षं लिकाना छ्वःम्ह छम्ह मजदुरयात पुनःबहालि यायेगु खँय् मजदुर व ब्यवस्थापन पक्ष दथुइ हाकनं वार्ता यानाः निष्कर्ष पिकायेगु खँय् निर्णय जुइवं गार्मेन्ट संचालनय् वःगु खः ।
निष्काशित मजदुरयात बहाली यायेमाःगु माग यासे माओवादी लिसे सतीगु मजदुर संगठनं अनया छम्ह प्रशासनिक कर्मचारीयात हातपात यायेवं ब्यवस्थापन पक्षं नं अनिश्चितकालया निंतिं गार्मेन्ट बन्द याना बिउगु खः ।
नेपाःया हे दकलय् तःधंगु थुगु गार्मेन्टं अन्तर्राष्ट्रिय जोन प्लेयर व स्प्रिङउड ब्राण्डया तयारी वसःत उत्पादन याना वयाच्वंगु दु ।
थुगु गार्मेन्टं उत्पादन जुइगु वसःत भारतया लिसें मेमेगु देशय् नं निकासी याना वयाच्वंगु दु ।
