पेट्रोलियम पदार्थया भाः थहां वन
येँ (सन्ध्या टाइम्स) / चिकं न्याईपिं अप्वःगु व विश्वय् आर्थिक संकट चिलावनाः अर्थतन्त्रय् सुधार वइगु संकेत खनेदयेवं पेट्रोलियम पदार्थया भाः नं थहां वंगु दु ।
शुक्रवाः जक प्रति व्यारेल चिकं अमेरिकी डलर ६५ स्वयां नं थहां वंगु दु । थुगु भाः धयागु वंगु खुलाया दुने जूगु दकलय् अप्वः मूल्यवृद्धि खः ।
अथे हे शुक्रवाः यूरोपया बजारय् कच्चा पेट्रोलियम पदार्थ प्रति व्यारेल ६५ दशमलव ७५ डलरं तक कारोवार जूगु दु । थुगु कारोवार धयागु विहीवाः जूगु कारोवार स्वयां १ दशमलव ६३ डलर अप्वः खः ।
वंगु मार्चय् पेट्रोलियम पदार्थया भाः कुहां वयाः प्रति व्यारेल ३५ डलर तक जूगु खः । अमेरिकाया इनर्जी विभागं जारी यागु विवरण कथं वंगु वालय् अमेरिकाय् निर्यात जूगु चिकनय् अप्रत्याशित रुपं भाः कुहां वंगु खः ।
चिकंया लगानीकर्तात अमेरिकी अर्थतन्त्रय् वःगु सुधारं लय् तायाच्वंगु दु ।
