माओवादीया संघर्ष ज्याझ्वः तयार
येँ (सन्ध्या टाइम्स) / प्रधानसेनापति प्रकरणय् माओवादीं संसदय् हयेत्यंगु संकल्प प्रस्तावयात दर्ता याके मखु धायेवं आः माओवादीं सदन व सतक निगुलिं थासय् आन्दोलन तच्वयेकीगु जूगु दु । थौं सुथय् च्वंगु माओवादी सचिवालयया बैठकं उगु निर्णय याःगु खः ।
बैठकं नागरिक सर्वोच्चताया निंतिं सदन व सतकय् आन्दोलन यायेगु निर्णय याःगु खः ।
माओवादीं दयेकूगु आन्दोलनया ज्याझ्वः कथं थ्वहे वइगु २० गते देय्न्यंकंया सीडीओ ज्याकुथी निघौ धर्ना व घेराउ याइगु ग्वसाः दु । अथे हे २१ गते निसें ३१ गते तक फुक्कं गाविसय् जनपरिचालन यायेगु निर्णय याःगु दु ।
माओवादीं व्यवस्थापिका संसदय् दर्ता यायेत्यंगु संकल्प प्रस्तावयात दर्ता याके मखु धायेगु अधिनायकी चरित्र खः धकाः नं ठहर याःगु दु ।
माओवादीं अवरुद्ध याना-च्वंगु संसद चले याके बीगु निंतिं सभामुख सुभाष नेम्बाङं संकल्प प्रस्तावयात सदनय् प्रवेश याकेगु बचं बियादीगु खः तर आः फुक्क हे दलत माने मजूगु कारणं उगु प्रस्ताव दर्ता याके फइ मखुत धकाः सभामुखं हे धया हयेवं माओवादी तम्वःगु दु ।
संकल्प प्रस्ताव अस्वीकृत जुइवं माओवादीं थौं हे संसद अवरुद्ध याइगु जूगु दु ।
थ्वहे झ्वलय् माओवादीया पोलिटब्युरो बैठक नं याकनं च्वनेत्यंगु दु । थौंया सचिवालय बैठकं पोलिठब्यूरो बैठकया लागिं नं एजेन्डाय् सहलह याःगु खः ।
