प्रम निवास बालुवाटार घेराउ लिसे चक्काजाम
शहिद परिवार लिसे जनआन्दोलनया घाःपाः जूपिंसं बुधवाः सुथय् ७ बजेनिसें निघौतक्क प्रधानमन्त्री निवास बालुवाटार घेरय् यायेगुया लिसलिसे चक्काजाम याःगु दु ।
मंगलवाः माइतीघर मण्डलाय् शान्तिपूर्ण आन्दोलनय् कुहांवःपिंत अमानवीय तरिकां हस्तक्षेप यानाः थःपिंके दुगु धेबा व मोबाइल लुटय् याःगु विरोधय् चक्काजाम यायेमाःगु खँ इमिसं धाःगु दु । ऐतिहासिक जनआन्दोलन ६२/६३या शहिद परिवार लिसे घाःपाः सरोकार समितिया नायः नापं घाःपाः मेघराज आचार्यं जनयुद्ध, जनआन्दोलन व मधेस आन्दोलनया शहिदया सीम्हय् न्हुयाः सत्ताय् थ्यनेवं नेतातय्सं शहिद व घाःपाः जूपिंत बेवास्ता याःगु द्वपं बियादिल ।
शहिद प्रतिक स्मृति केन्द्र नेपालया नायः जे.बी. धौलाकोटीया कथं फुक्क आन्दोलनया शहिद लिसे घाःपाः जूपिंत समान रुपय् सरकारं व्यवहार मयाःतल्ले आन्दोलन स्थगित मजुइगु धयादिल ।
