आदिवासी फिल्मया व्यवसाय

येँ (सन्ध्या टाइम्स) / बिहिवाःनिसें शुरु जूगु स्वक्वःगु अन्तर्राष्ट्रिय आदिवासी चलचित्र महोत्सव थौं क्वचायेत्यंगु दु । थ्व झ्वलय् थौं 'आदिवासी जनजाति चलचित्रया व्यावसायीकरण' विषयय् अन्तरक्रिया जुल । ज्याझ्वलय् सूचना तथा साचार सचिव सुशिल घिमिरें जनजातितय् चलचित्र निर्माण व प्रदर्शनय् खनेदुगु समस्या समाधानया निंतिं विधेयक तयार जूगु खँ कनादिल ।
नेपाल चलचित्र संघया द्वितीय उपाध्यक्ष प्रदीप उदयं चलचित्र ब्यावसायीकरण जुइ हे माःगु बिचाः प्वंकादिलसा नेपाल चलचित्र विकास बोर्डया अध्यक्ष गणेश भण्डारीं फिल्म लोकंह्वाःसा जक स्तरीय जुइगु बिचाः तयादिल । श्रब्यदृश्य उद्यमी संघया अध्यक्ष प्रेम लामिछानें जनजातिया चलचित्र नं न्यानाः स्वयेगु बानी यायेमाः धयादिल । ज्याझ्वलय् आदिवासी जनजाति चलचित्र महासंघपाखें नेवाः जागरण संकिपा माचया नायः विजयरत्न तुलाधरं 'आदिवासी जनजाति चलचित्रया ब्यावसायीकरण' विषयक ज्यापौ न्ह्यब्वयादीगु खः । ज्याझ्वः आदिवासी चलचित्र महोत्सवया संयोजक नविन सुब्वाया सभापतित्वय् जूगु खः ।