आःया नेतृत्व कांग्रेसया : सिटौला
नेपाली कांग्रेसया महामन्त्री कृष्णप्रसाद सिटौलां आःया सरकारया नेतृत्व कांग्रेसं याइगु खँ धयादीगु दु ।
रिपोटर्स क्लबं बुधवाः ग्वसाःग्वःगु छगू साक्षात्कारय् न्ववानादिसें सिटौलां शान्ति प्रक्रिया निष्कर्षय् थ्यनेधुंकाः कांग्रेसं सरकारया नेतृत्व यायेगु न्हयःथनादिल । प्रधानमन्त्री भट्टराईं हे शान्ति प्रक्रिया पूवंकीगु आशय प्वंकादिसें सिटौलां बाबुरामलिपा कांग्रेसया नेतृत्वया पाः जूगु धयादिल ।
वय्कलं कांग्रेस सरकारया प्रस्ताव कथं संविधानसभाया ई खुला तनेगु पक्षय् मदुसां नं न्हय्गू बुँदे सहमतिया समिक्षाया आधारय् म्हो ई तनेत तयार जुइगु धयादिल । राज्य पुनर्संरचना आयोगया संयोजक क्वःछिइमफूगु प्रधानमन्त्री भट्टराईया कमजोरी जूगु द्वपं नेता सिटौलां बियादिल ।
वय्कलं लच्छिया दुने छेँबुँ लित बिइगु ज्या क्वचाये माःगुलिइ उगु ज्या जुइमफुगु विषययात कांग्रेसं वइगु स्वंगू दलया शीर्ष बैठकय् गम्भीरताया लिसे ल्ह्वनीगु जानकारी बियादिल ।
