सार्वजनिक लेखा समितिपाखें क्यासिनोया कार्यविधि दयेकेत निर्देशन
व्यवस्थापिका संसद अन्तर्गतया सार्वजनिक लेखा समितिं क्यासिनोया राजस्व म्हयेगु विषयलय् लच्छिया दुने कार्यविधि दयेकाः लागू यायेत निर्देशन बिउगु दु । मंगलवाः च्वंगु सार्वजनिक लेखा समितिया बैठकं राजस्व म्हयेगु विषययात गम्भीरता पूर्वक कयाः ज्या यायेत पर्यटन मन्त्रालय व मन्त्री परिषदयात निर्देशन बिउगु खः ।
आःतक्क लाइसेन्स नवीकरण मयागु क्यासिनोतय्त खारेज यायेत लेखां अर्थ, गृह व पर्यटन मन्त्रालययात निर्देशन बिउगु खः । ताः ई निसें क्यासिनोया राजस्व म्हयेमफयेवं सार्वजनिक लेखां प्रमुख सचिव माधव घिमिरे, अर्थ सचिव कृष्णहरी बास्कोटा, पर्यटन सचिव व राजस्व महाशाखाया प्रमुखलिसे मंगलवाः सहलह याःगु खः ।
भारतीय नागरिक राकेश वाद्वाया न्यागू क्यासिनोपाखें म्हये ल्यँदनीगु स्वीन्यागू करोड तका राजस्व व क्यासिनोय् नेपाःमित दुहांवनेगु बारे लिपांगु दिंसं तसकं चर्चाय् वयाच्वंगु खः । वाद्वायात राजनीतिक संरक्षण दुगुलिं कारवाहीया प्रकृया न्ह्यःने न्ह्याकेत ज्यामछिंगु धाःगु दु ।
