कांग्रेसया नेतृत्व सुजातां याइगु
येँ (सन्ध्या टाइम्स) / नेपाली कांग्रेस व फोरम दुने ब्वलनाच्वंगु विवादया कारणं प्रधामन्त्री माधव नेपालं थौं तकं थःगु सरकारयात पूर्णता बी मफुनि । वंगु शुक्रवाः हे पूर्ण मन्त्रिमण्डल गठन याये सिधयेकेगु ग्वसाः वय्कलं ग्वयादीगु खः ।
नेपाली कांग्रेसं सुयागु नेतृत्वय् सरकारय् वनेगु धइगु विवाद ज्यंकेत थौं अनौपचारिक बैठक च्वंगु दु । थौंया बैठकं पार्टी सभापति गिरिजाप्रसाद कोइरालाया म्ह्याय् सुजाता कोइरालाया नेतृत्वय् सरकारय् वनेगु निर्णय यायेफुगु खँ धाःगु दु । कांग्रेसं थःपिनि विवाद समाधान याये मफयेवं सभापति कोइरालायात थुकिया जिम्मा बीगु निर्णय याःगु खः । कोइरालां उकुन्हुंनिसें हे सुजाताया पक्षय् बिचाः तया वयाच्वंगु खः ।
उखे फोरम दुने नं सरकारया नेतृत्व सुनां यायेगु धइगु विवाद ज्यंके मफुनि । विवादं यानाः फोरम कुचा समेत जुइफु धाःगु दु ।
