थौं नं आयोग गठन जुइमफुत
राज्य पुनर्संरचना आयोगया अध्यक्ष पदय् सहमति जुइमफयेवं प्रमुख राजनीतिक दलतय्सं थौं राज्य पुनर्संरचना आयोग गठन यायेमफुत । प्रमुख दलतय् मुँज्याय् अध्यक्ष पदया निंतिं न्हय्म्हेसिया नां वःगु खःसां राजनीतिक दलतय्सं थःगु पार्टीनाप सःतिम्ह मनूयात अध्यक्षय् तयेत स्वयेवं सहमति जुइमफुगु खः ।
प्रमुख दलतय् मुँज्याय् आयोगया अध्यक्ष पदया निंतिं नेपालभाषाया न्ह्यलुवाःत पद्मरत्न तुलाधार व माणिकलाल श्रेष्ठ नापं केदाभक्त माथेमा, पिताम्वर शर्मा, विमल कोइराला, कुलचन्द्र गौतम व गणेशमान गुरुङया नां प्रस्तावित जूगु खः ।
उगु मुँज्या स्वयां न्ह्यः संयुक्त मधेशी मोर्चां आयोग गठन प्रति असहमति प्वंकेवं सोमवाः सुथय् च्वंगु मुँज्या निष्कर्षबिहीन जूगु खः । लिपा स्वंगू प्रमुख दल व माओवादी व मधेशी मोर्चाया बिस्कं बिस्कं मुँज्या च्वंगु खः । मोर्चायात नं सहमति कयाः बहनी हानं प्रमुख दलया मुँज्या च्वंगु खः ।
मुँज्याय् आयोगया दुजः पदया निंतिं नीन्याम्हेसिया नां प्रस्ताव याःगु खः । मुँज्यां न्हय्म्ह दुजः दइगु आयोग दयेकीगु न्हापाया अनौपचारिक सहमतियात हीकाः गुम्ह दुगु आयोग दयेकीगु निर्णय याःगु दु ।
आयोग गठनया निंतिं प्रमुख दलतय् मुँज्या हानं मंगलवाः सुथय् च्वनीगु ज्याझ्वः दु । दलत दथुइ जूगु सहमति कथं सोमवाः हे आयोग गठन जुइमाःगु खः ।
