आदिवासी नेतात थःगु हे पार्टी नेतृत्व प्रति आक्रोशित

नेपाली कांग्रेस व नेकपा (एमाले)या नेतातय्सं थःगु हे पार्टी नेतृत्व प्रति आक्रोश प्वंकूगु दु । पहिचान व सामर्थ्यया आधारय् संविधानसभाया राज्य पुनर्संरचना व राज्य शक्तिया बाँडफाँट समितिं तयार याःगु प्रतिवेदनयात विज्ञ समूह व आयोगया नांमय् पार्टी नेतृत्वं हे षड्यन्त्र यानाच्वंगु धासें नेतातय्सं आक्रोश प्वंकूगु खः ।

आदिवासी जनजाति संयुत्त संघर्ष समितिं सोमवाः येँय् याःगु 'न्हूगु संविधानय् आदिवासी जनजातिया अधिकार सुनिश्चितताया मुद्दाय् काठमाडौं भेला'य् नेतातय्सं थःपिं पार्टीया प्रतिनिधि मखसें आदिवासीया हैसियतं न्ववनाच्वनागु धासें थःपिं निरन्तर पहिचानया निंतिं संघर्ष यानाच्वनेगु प्रतिवद्धता प्वंकूगु खः ।

ज्याझ्वलय् कांग्रेस सभासद् इन्द्रबहादुर गुरुङं आदिवासी जनजातिया हक अधिकारया पक्षय् दनीगु इलय् पार्टीं कारवाही याःसां थः तयार जूगु धयादिल । वय्कलं संसदय् विज्ञतय् समिति दयेकेगु बारे दर्ता जूगु प्रस्तावया विपक्षय् थःपिं सशक्त रुपं न्ह्यानागुलिं संशोधन प्रस्ताव लितकायेत सरकार बाध्य जूगु धयादिल ।

वय्कलं कांग्रेसपाखें थः नापं न्याम्ह सभासद्तय्सं उकिया विरुद्ध प्रस्ताव दर्ता याःगु तर लिप कांग्रेस सचेतक लक्ष्मण घिमिरें थःपिंसं उगु प्रस्ताव लितकाःगु धकाः मखूगु प्रचार याःगु धयादिल । यदि थःपिंसं प्रस्ताव लितकाःगु खःसा उकीया प्रमाण क्यनेत नं कांग्रेस नेतृत्वयात वय्कलं हाथ्या बियादिल ।

अथेहे ज्याझ्वलय् एमाले पोलिटब्यूरो दुजः विजय सुब्बां आदिवासी जनजातितय् लडाँइ कमजोर खनाः हे आदिवासीतय्त पार्टी नेतृत्वतय्सं हेपे यानाच्वंगु धयादिल । वय्कलं पार्टी नेतृत्वं आदिवासीत विरुद्ध यानाच्वंगु हेपाई प्रविधिया विरुद्ध सशक्त रुपं न्ह्यावनेमाःगु खँय् बः बियादिल ।

संविधानसभापाखें प्रस्तावित १४ प्रदेशया प्रस्ताव हीकेत प्रमुख दलया शीर्ष नेतातय्सं थीथी बहाना पिकयाः बाधा प्वंकाच्वंगु दावी यानादिसें वय्कलं १४ प्रदेश गुवलय् तक हीलिमखु उवलय् तक नेतात निरन्तर षड्यन्त्र यानाच्वनीगु धयादिल । वय्कलं सतक व सदनपाखें आदिवासी आन्दोलनयात सशत्त यायेमाःगु खँय् नं बः बियादिल ।

संघर्ष समितिया वर्तमान नायः नगेन्द्र कुमालया सभापतित्वय् जूगु ज्याझ्वलय् माओवादी सचिव सीपी गजुरेलं गुवलय् तक आधिकार बिहीनतय्त अधिकार सम्मपन याइमखु उबलय् तक शान्ति प्रक्रिया पूर्णरुपं पूमवनीगु दावी यानादिल । वय्कलं आदिवासी जनजातितय् माग प्रति थःगु एक्यबद्धता प्वंकादिसें थज्याःगु हे अवस्थां शान्ति प्रक्रिया क्वचायेकेत स्वःसा अज्याःगु शान्ति अस्थायी जक जुइगु धयादिल । वय्कलं जातिय मुद्दा बिचारया मुद्दा नं जूगुलिं उकिं फुक्कं वर्ग व जातिय मुक्तिया खँ ल्ह्वनेमाःगु न्ह्यथनादिल ।

ज्याझ्वलय् संविधानसभाया अध्यक्ष सुभाषचन्द्र नेम्वाङं जनआन्दोलनपाखें प्राप्त आधिकारत संस्थागत यायेत अझ नं ल्यँ दनीगु धयादिसें राज्य पुनर्संरचना आयोगपाखें वइगु प्रतिवेदन संविधानसभाया भावना अःख मजुइगु ठोकुवा यानादिल ।