संविधानसभाया म्याद थप यायेगु सहमति मजूनी : कोइराला
नेपाली कांग्रेसया सभापति सुशील कोइरालां संविधानसभाया ई तनेगु बारे थःगु पार्टीं सभासद्तय्त ह्वीप जारी मयागु दावी यानादीगु दु ।
रिपोटर्स क्लबं सोमवाः याःगु छगू साक्षात्कारय् न्ववानादिसें कोइरालां थः पार्टीया सभापति जूसां नं संविधानसभाया म्याद थप यायेगु विषयलय् मतदान यायेत कांग्रेसपाखें सुनां ह्वीप जारीयात धइगु थःम्हं मस्यूगु धयादिल ।
वय्कलं संविधानसभाया ई तनेगु वा मतनेगु वा गुलि तनेगु धइगु निर्णय केन्द्रीय कार्य समितिं निर्णय यायेगु धयादिल । वय्कलं संविधानसभाया ई तनेत दलत सहमत जूगु दावी याना सरकारं संसदय् दर्ता याकूगु संविधानसभाया ई तनेगु प्रस्तावय् कांग्रेसया समर्थन मदुगु वय्कलं स्पष्ट यानादिल ।
कांग्रेस सभापति कोइरालां वइगु मंसिर १४ गतेलिपा नेपाली कांग्रेसया नेतृत्वय् सरकार दयेकेमाःगु न्ह्यथनादिल । माओवादी व एमालें निक्व निक्व सरकारया नेतृत्व यायेधुंकुगुलिं आःया सरकारया नेतृत्व कांग्रेसयात दयेमाःगु धयादिल ।
