नियमित विद्युत अनुगमनया व्यवस्था यायेत अख्तियाया निर्देशन
अख्तियार दुरुपयोग अनुसन्धान आयोगं वइगु हिउँदय् मत आपूर्ति म्हो यायेत व मत खुइगु ज्याय् नियन्त्रण यायेत नियमित विद्युत अनुगमनया व्यवस्था यायेत नेपाल विद्युत प्राधिकरणयात निर्देशन बिउगु दु । अख्तियारं मत खुइपिं संस्था नापं मनूतय् स्वंगू पुस्ताया नां सार्वजनिक यायेत निर्देशन नं बिउगु दु ।
मत खुया उपभोग याइगु संस्था, व्यवसायीत व साधारणा मनूत स्वंगु पुस्ते विवरण धेबा नापं सार्वजनिक याना माःगु कानूनी कारवाही यायेत व मतया महशुल ल्यँ दनीगु बक्यौता नापं असुल उपर यायेत तदारुकतालिसे कारवाही न्ह्याकेत अख्तियारं निर्देशन बिउगु दु ।
अख्तियारया प्रवक्ता ईश्वरीप्रसाद पौड्यालं मंगलवाः प्राधिकरणयात छपु पौं च्वयाः थज्यागु उजं बियादीगु खः । विद्युत प्राधिकरण स्वयाः पिनेया ब्यागलं अस्तित्वय् दुगु थीथी आयोजनाय् ज्या यानाच्वंपिं नेपाल विद्युत प्राधिकरणया ज्याकमिपिंत नेपाल विद्युत प्राधिकरणय् हयेत नं अख्तियारं निर्देशन बिउगु दु ।
अथेहे अख्तियारं विद्युत् प्राधिकरणया ज्याकमिपिंत निःशुल्क बिया वयाच्वंगु मतया सुविधा खारेज यायेत नं धाःगु दु । सरकारं चैत ९ गते ऊर्जा संकट समाधानबारे संसदय् न्ह्यब्वगु ज्याझ्वलय् सुयात नं विशेष सुविधाय् मत आपूर्ती मयायेगु व नेपाल विद्युत प्राधिकरणया ज्याकमिपिंत थौंकन्हय् बिया वयाच्वंगु निःशुल्क मत सेवा खारेज यायेगु नं न्ह्यथंगु खः ।
