सहिद व घाइते मंकाः संघर्ष समितिपाखें बालुवाटारय् धर्ना
सहिदया छेँजः नापं जनआन्दोलनया घाःपाः जूपिंलिसे याःगु सम्झौता कार्यान्वयन जुइमाःगु माग तयाः सहिद व जनआन्दोलनय् घाःपाः जूपिनि मंकाः संघर्ष समितिं सोमवाः प्रधानमन्त्री निवास बालुवाटारय् निघौतक्क धर्ना बिउगु दु ।
सहिद घोषणा व घाःपाः जूपिनिगु उचित व्यवस्थापन यायेत आयोग नीस्वनेमाःगु, राजनीतिक नियुक्तिइ सहिद परिवार लिसे घाःपाः जूपिनिगु प्रतिनिधित्व सुनिश्चित यायेमाःगु, सहिद लिसे घाःपाः जूपिंत दीर्घकालीन सेवा सुविधा बिइमाःगु, राहत बिइमाःगु, वासः खर्चया व्यवस्था यायेमाःगु लगायत माग तयाः इमिसं धर्ना बिउगु खः ।
घाःपाः अपाङ्गतय्सं मंगलवाः माइतीघर मण्डलाय् घौछि तक चक्काजाम याइगु ज्याझ्वः दु ।
