आः वइगु ई तसकं हाथ्यापूर्ण : प्रधानमन्त्री
प्रधानमन्त्री माधवकुमार नेपालं थः तसकं थाकूगु ईलय् प्रधानमन्त्री जुयागुलिं आः वइगु ई तसकं हाथ्यापूर्ण जुइगु खँ धयादीगु दु ।
प्रधानमन्त्री जुइधुंकाः न्हापांगु खुशी थःगु गृह जिल्ला रौतहट झायादिम्ह प्रधानमन्त्री नेपालं आइतवाः चन्द्रनिगाहपुरया जनज्योती बहुमुखी क्याम्पसय् ग्वसाः ग्वःगु लसकुस व अभिनन्दन ज्याझ्वलय् वयेकलं थाकूगु ईलय् प्रधानमन्त्री पदय् च्वनाःगुलिं आः वइगु दिंत तसकं हाथ्यापूर्ण जुइ धयादिल । वयेकलं शान्ति प्रकृयायात तार्किक निष्कर्षय थ्यंकेगु व ईलय् संविधान निर्माण यायेगु थःगु प्रमुख दायित्व जूगु धयादिल ।
प्रधानमन्त्री नेपालं माओवादीयात नं सरकारय् ब्वति कायेकेगु कुतः जुयाच्वंगु धासें मन्त्रीमण्डल छन्हू-निन्हू दुने हे पूर्ण रुपं गठन जुइगु धयादिल । माओवादीं थःयात न्ह्याक्वः हे द्वपं ब्युसां उकीयात सकारात्मक रुपं कयाः सल्लाह व सहमति यानाः जक न्ह्यावनीगु प्रतिबद्धता वयेकलं प्वंकादिल ।
प्रधानमन्त्री मंचय् न्ववानाच्वंगु ईलय् माओवादी कार्यकर्तातय्सं हाकूगु ध्वाँय् क्यंगु खः । लिपाः एमाले समर्थित युथ फोस्रया कार्यकर्तातय्सं माओवादी कार्यकर्तातय्त ज्वनाः प्रहरीयात लःल्हाःगु खः ।
