कन्हय् राज्य पुनर्संरचना आयोग गठन याइगु
प्रमुख राजनीतिक दलत दथुइ कन्हय् तकया दुने राज्य पुनर्संरचना आयोग नीस्वनेगु सहमति जूगु दु । आइतवाः सुथय् सिंहदरवारस्थित शान्ति मन्त्रालयसं च्वंगु प्रमुख स्वंगु दलया मुँज्यां कन्हय् तकया दुने दलतय्सं थःपिनिगु पाखें आयोगय् च्वनीपिं विशेषज्ञतय्गु नां प्रस्ताव यायेगु व उगु नांया आधारय् आयोग नीस्वनेगु सहमति याःगु खः । मुँज्यां मधेसी मोर्चालिसे नं च्वनाः आयोगय् गुलि मनूत दुथ्याकेगु धकाः सहलह यायेधुंकाः निर्णय याइगु जानकारी कांग्रेस उपसभापति रामचन्द्र पौडेलं बियादिल । स्वंगू दलतय् मुँज्याय् धाःसा अप्वलय् न्हय्म्ह दुजः दुगु आयोग नीस्वनेगु बारे सहलह जूगु खः ।
थ्वस्वयां न्ह्यः शुक्रवा बहनि संविधानसभापाखें संविधान संशोधन यायेत दर्ता याःगु बिशेषज्ञ समिति दयेकेगु प्रस्तावय लित कायेगु इलय् स्वंगू दलत दथुइ स्वन्हुया दुने राज्य पुनर्संरचना आयोग नीस्वनेगु सहमति जूगु खः ।
