कब्जा जग्गा लितबिइत प्रचण्ड सहित स्वंगू दलया नेतात बर्दियापाखे
एकीकृत नेकपा (माओवादी)या नायः पुष्पकमल दाहाल 'प्रचण्डं' थनिंनिसें कब्जा जग्गा लित बिइगु प्रक्रिया न्ह्याकीगु धयादीगु दु । मू स्वंगू दलया जिल्ला नेतातलिसे च्वनाः समस्या हल यायेत धकाः थः बर्दिया वनेत्यनाःगु जानकारी दाहालं साचारकर्मीतय्त बियादीगु खः । क्रान्तिकारी भूमि सुधारया नारा बिउगु माओवादीं बिना विकल्प भूमिहीन किसानतय्गु जग्गा लित बिइत निर्देशन बिउगु धासें किसानतय्सं अटेर यायेवं नायः दाहाल आइतवाः बर्दियापाखें झायादीगु खः ।
माओवादी नायः दाहाललिसे नेपाली कांग्रेसया महामन्त्री कृष्ण सिटौला, एमाले न्वकु बामदेव गौतम, भूमि सुधारमन्त्री लगायतया पुचः बर्दियापाखे वंगु खः । नेतृत्वं कब्जा जग्गा लित बिइत निर्देशन बिउसां नं किसानतय्सं निर्देशनया अवज्ञा यायेवं दाहाल कांग्रेस व एमालेया प्रतिनिधिपिं लिसे बर्दिया झायादीगु खः ।
थ्वहे दथुइ नेपाली कांग्रेसया महामन्त्री कृष्णप्रसाद सिटौलां शान्ति प्रक्रियायात तार्किक निष्कर्षय् थ्यंकेगु निंतिं कब्जाय् दुगु छेँबुँ लिसेंया सम्पत्ति लित बिइगु निर्णय कार्यान्वयनया विकल्प मदुगु जानकारी बियादिल । वय्कलं न्हय्गू बुँदे सहमति कार्यान्वयन याकेगु पक्षय् माओवादीया मोहन वैद्य पक्षया असहमति जूसां नं उगु खँ पार्टीदुनेया आन्तरिक समस्या जूगु धयादिल ।
प्रमुख दलत दथुइ वंगु कार्तिक १५ गते जूगु न्हय्गू बुँदे सहमतिइ मंसिर ७ गतेदुने द्वन्द्वकालय् कब्जा यानातःगु छेँबुँ लित बिइगु खँ न्ह्यथनातःगु खः ।
