'आयोग गठन यायेगु निर्णय दुर्भायपुर्ण'
मधेशी जनअधिकार फोरम नेपालया नायः उपेन्द्र यादवं राज्य पुनर्संरचना आयोग गठन यायेगु धकाः प्रमुख दलत दथुइ जूगु निर्णय दुर्भायपूर्ण जूगु बिचाः प्वंकादीगु दु ।
रिपोटर्स क्लब लुम्बिनीं आइतवाः बुटवलय् याःगु छगू साक्षात्कार ज्याझ्वलय् न्ववानादिसें नायः यादवं आम मधेशी जनताया मागयात उपेक्षा यानाः राज्य पुनर्संरचना आयोग गठन यायेगु निर्णय दुर्भायपुर्ण जूगु बिचा प्वंकादिल । मधेशवादी दलं न्ह्यावलें विरोध यानाः वःगु राज्य पुनर्संरचना आयोग गठन यायेगु खँय् मेमेगु मधेशीवादी दलतय्सं नं सहमतिं प्वंकूगु खँ रहस्यपूर्ण जूगु धयादिल । वय्कलं मधेशी जनताया भावनायात राज्य पुनर्संरचनाय् सम्बोधन मयासाः हाकनं विद्रोह जुइफुगु ख्याच्वः नापं बियादिल ।
वर्तमान सरकार असफल जुइधुंकुगु दावी यानादिसें पुलाम्ह उपप्रधानमन्त्री नापं जुयाच्वंम्ह यादवं राष्ट्रिय सहमतिया सरकार गठन यायेमाःगु खँय् बः बियादिल । मन्त्रिमण्डलया आकार बारे टिप्पणी यानादिसें यादवं औचित्यया आधारय् स्वयां नं लय्तायेकेगु उद्देश्यं मन्त्रिमण्डलया आकार इतिहासया हे तःधंगु दयेकुगु दाबि यानादिल ।
मेगू छगू प्रशंगय् यादवं खुद्वः माओवादी लडाकुतय्त सुरक्षा निकायलय् समायोजन यायेवं हे शान्ति पलिस्था जुइ धइगु बिचाः गलत जूगु धयादिल ।
