फोरमय् तिव्र विवाद
सरकारयात ब्यूगु समर्थन लित कायेगु यादवया ख्याच्वः
मधेशी जनअधिकार फोरमय् सरकारय् ब्वति कायेगु वा मकायेगु धकाः तिव्र विवाद जूगु दु । सरकारय् वनेगु वा मवनीगु धकाः पार्टीया औपचारिक निर्णय यायेत म्हिग निसें न्ह्याःगु बैठकय् अध्यक्ष उपेन्द्र यादव व संसदीय दलया नेता विजयकुमार गच्छादार दथुइ शनिवाःया बैठकय् आरोप-प्रत्यारो जुइवं विवाद चरम रुपय् थ्यंगु दु ।
बैठक न्ह्यानाच्वंगु ईलय् बैठक त्वःता वंम्ह अध्यक्ष यादवं संसदीय दलया नेता गच्छादरया हस्ताक्षर अभियान व पार्टी निर्णय मयासें सरकारय् थःगु नेतृत्वय् वनीगु निर्णय गैरकानुनी धासें आपत्ति प्वंकूगु दु ।
वयेकलं लिपा पत्रकार सम्मेलन यानाः पार्टीं निर्णय हे मयाःगु ईलय् सरकारय् वनेगु संसदीय दलया निर्णय गैरकानुनी जूगु धयादिल । वयेकलं कांग्रेस, एमाले लगायत प्यंगू दलं थुकीयात मान्यता बीगू धइगु पार्टी कुचाः थलीगु षड्यन्त्र जूगु द्वपं ब्यूसें पार्टी दुने सहमति जुइमफुसाः माधव नेपाल नेतृत्वया सरकारयात ब्यूगु समर्थन लित कायेगु ख्याच्व नं बियादिल ।
अथेहे, थौं हे संसदीय दलया नेता विजयुमार गच्छदारं नं पत्रकार सम्मेलन यासें संसदीय दलया निर्णययात पार्टीं मान्यता मब्यूसाः अप्रिय घटना जुइगु ख्याच्वः बियादिल । वयेकलं पार्टी अध्यक्ष यादवं हस्ताक्षर अभियानयात गैरकानुनी धका: ब्यूगु धापू आपत्तिजनक जूगु नं धयादिल । वयेकलं न्ह्याथे यानाः जुसां थः लोकतान्त्रिक सरकारय् ब्वति कया:तुं त्वतीगु धासें पार्टीं थःगु निर्णययात समर्थन यायेमाः धयादिल ।
