कांग्रेस सरकारय् वनीगु
नां धलः देयेकेगु जिम्मा कोइरालायात
नेपाली कांग्रेस संविधानसभा दलं पार्टी सरकारय् वनीगु निर्णय याःगु दु । तर सरकारय् सुयागु नेतृत्वय् वनेगु व सु सु वनेगु धकाः अन्तिम निर्णय यायेगु जिम्मा पार्टी सभापति गिरिजाप्रसाद कोइरालायात केन्द्रीय कमिटीं ब्यूगु दु । सराकारय् सुयागु नेतृत्वय् वनेगु धकाः विवाद कायम हे जूगुलिं नां चयन यायेत पार्टी सभापतियात जिम्मा ब्यूगु खः ।
शनिवाः केन्द्रीय कमिटीया बैठकं पार्टीं सभापतियात उगु जिम्मा ब्यूगु खः । बैठकं सभापति गिरिजाप्रसाद कोइरालायात जिम्मा ब्यूसां कोइरालां धासा: प्यम्ह बरिष्ठ नेतात्यत थ्व जिम्मेवारी बियादीगु दु । सभापति कोइरालां कार्यवाहक सभापति सुशिल कोइराला, वरिष्ठ नेता शेरबहादुर देउवा, उपसभापति रामचन्द्र पौडेल व महामन्त्री विमलेन्द्र निधियात पार्टीइ आन्तरिक सहलह याना: पार्टीया पाखें मन्त्रीमण्डलय् ब्वति काइपिनी नां क्वछीत धा:गु दु । केन्द्रीय कमिटीया बैठक लिपाः संविधानसभा दलया बैठक च्वनाः उगु निर्णय अनुमोदन याःगु खः ।
संविधानसभा दलया ज्याकू सिंहदरवारय् च्वंगु बैठकय् कांग्रेस सरकारय् वनीगु जानकारी ब्यूसें सरकारया स्वरुप, सरकारया कार्यनिति, सरकारया न्युनतम साझा ज्याझ्वःया बारे सभासद्त नाप राय सल्लाह काःगु खः ।
थ्वस्वयां न्ह्यः पार्टी ज्याकू सानेपाय् च्वंगु केन्द्रीय कार्यसमितिया बैठकं सरकारय् वनीगु औपचारिक निर्णय याःगु खः । केन्द्रीय समितिया बैठकं कांग्रेस संसदीय दलया बैठकं ब्यूगु राय व सुझाव बमोजिम सरकारय् ब्वति कायेगु नेतातय् नां ल्ययेगु निर्णय याःगु खः ।
