'विज्ञ समूहया क्षेत्राधिकार संविधान हे तयेगु कथं संविधान संशोधन'
माओवादी संसदीय दलया मुख्य सचेतक देब गुरुङं विज्ञ समूहया कार्यविधि संविधानय् हे तयाः संविधान संशोधन यायेफइगु धयादीगु दु । रिपोर्टर्स क्लबं थौं ग्वसाः ग्वःगु साक्षात्कार ज्याझ्वलय् न्ववानादिसें गुरुङं आःया संविधान संशोधन विद्येयक पारित जूसा राज्य पुनर्संरचना आयोग स्वयाः नं धिसिलाइगु विज्ञ समूह नीस्वनीगु व उकिं राज्य पुनर्संरचना समितिं न्ह्यब्वःगु प्रतिवेदनयात नापं हिलाबुलाः यायेफइगुलिं उगु खँ थःपिंत मान्य मजुइगु धयादिल ।
वय्कलं आः न्ह्यब्वःगु हे संविधान संशोधन विद्येयकय् छगू उपदफा तनाः राज्य पुनर्संरचना लिसे राज्य शक्तिया बाँडफाँड समितिं न्ह्यब्वःगु प्रतिवेदनयात आधार दयेकाः सुझाव बिइगु ब्यवस्था नापं यायेमाःगु स्पष्ट यानादिल । विज्ञ समूहयात संविधानय् हे ब्यवस्था यायेगु सहमति मजूगु दलत दथुइ सहमति मजूगु गुरुङया धापू खः ।
वय्कलं प्रधानमन्त्री व नायः पुष्पकमल दाहालं नापं थज्याःगु सहमति मजूगु धाःगुलिं संशोधन प्रस्तावया भाषा अज्याःगु गुकथं वल धकाः शंका नापं प्वंकूगु खः ।
