उपसमितिया वैठक थौं नं स्थगित
राज्यया शासकीय स्वरुप व निर्वाचन प्रणाली लगायतया विषयलय् खनेदुगु विवाद समाधान यायेत संवैधानिक समिति अन्तर्गत नीस्वंगु विवाद समाधान उपसमितिया थौं च्वने धयातःगु बैठक स्थगित याःगु दु ।
संविधान संशोधनया झ्वलय् पार्टीतदथुइ खनेदुगु विवादयात समाधान यायेमाःगु, स्वंगू दलया बैठक च्वनाः असहमतिया बुँदाय् सहमति मालेगु व संविधान संशोधनया प्रक्रियाय् वनेमाःगु कारण क्यनाः थौं च्वने धयातःगु उपसमितिया बैठक स्थगित यायेमाःगु उपसमितिया दुजः लक्ष्मणलाल कर्णं जानकारी बियादिल । सद्भावना पार्टीया ल्यू नायः कर्णया कजित्वय् नीस्वंगु कार्यदलं शासकीय स्वरुप व निर्वाचन प्रणालीया बारय् अध्ययन यानाः तयार याःगु सुझावलिसेया लिखित प्रतिवेदनदथुइ सहलह यानाः थौंया बैठकपाखें क्वःछीगु सहमति जूगु खः ।
उगु कार्यदलय् एकीकृत नेकपा -माओवादी)या खिमलाल देवकोटा, नेपाली कांग्रेसया राधेश्याम अधिकारी, नेकपा -एमाले)या अग्नि खरेल व सभासद् सपना मल्ल प्रधान दुजः जुयादीगु खः ।
