माओवादी केन्द्रीय समिति बैठक स्थगित

एकीकृत नेकपा माओवादीया थौं च्वने धयातःगु केन्द्रीय समितिया बैठक स्थगित जूगु दु । पार्टीदुने खनेदुगु आन्तरिक बिबादया बिषयलय् सहलह यायेत सुथय् झिंछताः इलय् च्वने धयातःगु बैठक स्थगित जूगु एसएमएसपाखें जानकारी वःगु केन्द्रीय दुजः दिनेश शर्मां जानकारी बियादिल । बैठक हाकनं मंसिर ३ गतेया नितिं सःतूगु दु ।

बिबाद समाधानया बिषयलय् शीर्ष तहलय् गृहकार्य यायेगु धासें वंगु कात्तिक २९ गते बैठक निन्हुया नितिं स्थगित याःगु खः । पार्टी नायः पुष्पकमल दाहाल लिसे न्वकु बाबुराम भट्टराईं पार्टी निर्णय अःखः ज्या याःगु धासें बरिष्ठ न्वकु मोहन बैद्यं पेश याःगु झिंनिगू बुँदे असहमतिया बिषयलय् थौं बैठकय् सहलह यायेगु ज्याभmवः दुगु खः । पार्टी नेतृत्व शान्ति व संविधानया नामय् आत्म समर्पणया दिशाय् वंगु धासें न्वकु मोहन बैद्य लिसे मूछ्याञ्जे रामबहादुर थापां बिरोध यानाः वयाच्वंगु खः ।

पार्टी केन्द्रीय समितिया निर्णय अःखः दाहाल - भट्टराई पक्ष जनसेनाया निःशस्त्रीकरण यायेगु प्रक्रियाय् न्ह्यःने न्ह्याःगु धासें बैद्य पक्षं सतक आन्दोलन नापं यायेधुंकूगु दु । जनसेनाया ल्वाभःया ताचाः प्रकरण, भारतलिसे प्रधानमन्त्रीं याःगु बिपा सम्झौता, सरकार नीस्वनेगु भmवलय् मधेसी मोर्चालिसे जूगु प्यंगू बुँदे सम्झौता लिसे दलतदथुइ जूगु न्ह्यगू बुँदे सहमतिया नं माओवादीया वैद्य पक्षं विरोध यानाः वयाच्वंगु खः । पार्टीया बिबाद समाधानया नितिं माओवादीया बैद्य पक्षया माग कथं केन्द्रीय समितिया बैठक सःतूगु जूसां नं दाहाल - भट्टराई पक्षं थीथी त्वहलय् बैठक ल्यूने घ्वानाः वयाच्वंगु नं वैद्य पक्षया द्वपं दुगु खः ।