सहमति व सहकार्यया विकल्प मदु : प्रधानमन्त्री
प्रधानमन्त्री माधवकुमार नेपालं शान्ति प्रकृया व संविधान निर्माणया निंतिं राजनीतिक सहमति आवश्य जूगु धासें सहमतिया निंतिं थम्हं कुतः यानाच्वनीगु प्रतिबद्धता प्वंकादीगु दु ।
येँय् मिनभवनय् चिनियाँ सरकारया ग्वहालि निजामति कर्मचारी अस्पतालया शनिवाः उल्लेज्या यासें प्रधानमन्त्री नेपलां शान्ति प्रकृयायात निर्धारित लक्ष्यय् थ्यंकेत व न्हूगु संविधान च्वयेत सहमति, सहकार्य व एकताया विकल्प मदु धयादिल । वयेकलं देय् संक्रमणकालय् जूगुलिं उकीयात याकनं क्वचायेकेगु निंतिं सहमति व दलीया एकता आवश्यक जूगु खँ धयादीगु दु ।
ज्याझ्वलय् नेपालया निंतिं चिनियाँ राजदूत क्यू गोहोङं आर्थिक प्रगति जुसाः जक नेपालय् सामाजिक व राजनीतिक स्थिरता कायम जुइगु बीचाः प्वंकादिल । वयेकलं नेपाःयात बियावयाच्वंगु आर्थिक व प्राविधिक ग्वहालियात निरन्तरता बीगु प्रतिबद्धता प्वंकादिल ।
चिनियाँ सरकारया ग्वहालि खुइगू करोड तकाः लागतय् निर्माण जूगु थ्व अस्पतालं निजामति कर्मचारीया नापं सर्वसाधारणयात नं सेवा उपलब्ध याइगु ग्वसाः दु ।
