संकल्प प्रस्ताव बारे संसदय् सहलह मजुइगु
राष्ट्रपति विरुद्ध एकीकृत नेकपा (माओवादीं) संसदय् दर्ता याःगु संकल्प प्रस्तावयात संसदय् सहलह यायेत मयंकेगु निर्णय सभामुख सुवास नेम्वाङः यानादीगु दु ।
शनिवाः सुथय् कार्यव्यवस्था परामर्श समितिया बैठक लिपा सभामुख नेम्वाङं राष्ट्रपतिया बारे संसदं फौसला यायेमज्यूगु धासे थुकीया बारे संसदय् सहलह मजूइगु खँ धयादिल । वयेकलं अदालतय् विचाराधिन मुद्दा व राष्ट्रपतियात संसदं निर्देशन बीगु व्यवस्था मदुगुलिं संसदय् संकल्प प्रस्ताव मयंकेगु निर्णय यानाःगु कनादिल ।
सिंहदरवारय् सभामुखया ज्याकूथी जूगु बैठकय् एमाले नेतृत्वयात समर्थन याइगु दलतय्सं संकल्प प्रस्ताव संसदय् यंकेमज्यूगु खँय् बः ब्यूगु खसाः माओवादीं धासाः संकल्प प्रस्ताव संसदय् मयंकूसाः हिउँदे अधिवेशन क्वचायेके मबीगु तर्क तःगु खः ।
कार्यव्यवस्था समितिया थ्व निर्णय प्रति माओवादीया प्रमुख सचेतक पोष्टबहादुर बोगटीं असहमति प्वंकूसें उकीया विरुद्ध संसद व सतकं आन्दोलन यायेगु धयादिल ।
