तःधंगु मन्त्री परिषद दयेकेगु जिगु बाध्यता : भट्टराई

प्रधानमन्त्री बाबुराम भट्टराईं शान्ति व संबिधान निर्माणया नितिं तःधंगु मन्त्री परिषद दयेकेगु थःगु बाध्यता जूगु धयादिल । न्यादासें अबरुद्ध शान्ति प्रक्रिया क्वःचाइगु संकेत खनेदुगुलिं उकियात निष्कर्षय् थ्यंकेत नं तःधंगु मन्त्री परिषद दुगु वय्कःया धापू खः ।

मंगलवाः बालुवाटारय् सञ्चारकर्मीतलिसे खाल्हासें वय्कलं संयुक्त सरकार जूगुलिं गठबन्धन दलया सिफारिसय् मन्त्रीतय्त सपथ नकेगु थःगु बाध्यता जूगु धयादिल । न्हापाया तुलनाय् थःगु मन्त्रीपरिषद तःधं मजूगु नं वय्कःया धापू खः ।

वय्कलं संसदय् प्रतिनिधित्व याइगु झिगू प्रतिशत सभासद्तय्त सरकारय् दुथ्याकेगु अन्तर्राष्ट्रिय प्रचलन दुगु चर्चा यासें थःगु मन्त्री मण्डल चीधं आकारया हे दुगु दाबी यानादिल ।