जनसंविधान मार्फत जनताया गणतन्त्र : भट्टराई

माओवादीया वरिष्ठ नेता डा. बाबुराम भट्टराईं माओवादीं सदन व सतकं आन्दोलन यानाः जनसंविधान मार्फत जनताया गणतन्त्र स्थापना यायेगु दावी यानादिल ।

गणतन्त्र पलिस्था जूगु दच्छि क्यंगु लसताय् माओवादीं शुक्रवाः येँय् याःगु ज्याझ्वलय् न्ववायेगु झ्वलय् वयेकलं सभासदत न्यानाः थःगु पक्षय् कयाः गठन जूगु सरकारं जनताया आकांक्षा कथं ज्या यायेमफइगु खँ धयादिल ।

वयेकलं नेपाली कांग्रेस व एमालेया गठबन्धनं राजतन्त्र पुनस्थापना यायेत नारायणहिटीइ निस्वनेमाःगु गणतन्त्र स्मारक रत्नपार्कय् निस्व‌ंगु द्वपं बियादिल । वयेकलं कांग्रेस व एमालें गणतन्त्र सिधेकेत योजनावद्ध तरिकां वर्तमान सरकार गठन या:गु धासें थ्व कठपुतली सरकारयात पर्दा ल्युनेच्वनाः प्रतिक्रियावादी शक्तितय्सं संचालन यानाच्वंगु द्वपं बियादिल ।