माओवादीं राजधानी केन्द्रीत शान्तिपूर्ण आन्दोलन याइगु
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' शान्ति स्थापनाया निंतिं राजधानी केन्द्रीत शान्तिपूर्ण आन्दोलन यायेगु खँ धयादीगु दु ।
शुक्रवाः यलय् जूगु ज्याझ्वलय् न्ववासें वयेकलं माधवकुमार नेपालया नेतृत्वय् गठन जूगु सरकार 'बेकी किङ' हेयेगु षडयन्त्र जूगु द्वपं बियादिल । वयेकलं संविधानसभाय् निगूगु तःधंगु दल नेपाली कांग्रेस व स्वयम् एमालेय अध्यक्ष झलनाथ खनाल दुसां संविधानसभाय् बुम्ह नेपालयात प्रधानमन्त्री देयेकूगु धइगु तःधंगु 'ग्रयाण्ड डिजाइन' ख: धयादिल ।
अध्यक्ष प्रचण्डं माओवादीयात शान्ति विरोधी धकाः गणतन्त्रयात संस्थागत यायेमबीगु कासाः न्ह्यानाच्वंगु आशंका प्वंकादिल । वयेकलं प्रतिक्रियावादीत माओवादीयात हाकनं जंगल छ्वयेत स्वयाच्वंगु धासें आः माओवादी जंगल मवनीगु व जनातया दथुइ च्वनाः गणतन्त्रयात बचेयायेत संघर्ष याइगु खँ कनादिल ।
