'नेपाल सम्वत राष्ट्रिय सम्वतया रुपय् कार्यान्वयन यायेमाः'

नेपाल सम्वतयात व्यवहारिक रुपय् राष्ट्रिय सम्बतया रुपय् कार्यान्वयन यायेत फुक्कसिया भावना कःघायेमाःगु बिचाः थीथी वक्तातय्सं प्वंकूगु दु । आइतवाः यलया यलध्वाखास्थित त्रिभुवन विश्वविद्यालयया नेपालभाषा केन्द्रीय विभाग स्मारिका उलेज्या ज्याझ्वलय् वक्तातय्सं फुक्कसिया भावना कःघाइगु ज्याभुवः हयेमाःगु खँय् बहः बियादिल ।

ज्याझ्वलय् सरकारपाखें नीस्वंगु कार्यदलया दुजः लिसे ज्योतिषविद् हरिनारायण मल्लं नेपाल सम्वतयात राष्ट्रिय रुपय् न्ह्याकेत नेपाल सम्वतया साल विक्रम सम्वतया महिना व गते तयेबलय् उपयुक्त जुइगु धयादिल । ज्योतिषविद् महेश्वर जुजुं नेपाल सम्बत स्वयाः नं पुलांगु यलम्बर वा यले सम्वतया महिमायात नं पुनःबिचाः यायेमाःगु धयादिसें जंगली युगय् नेवाः जाति नं किराँती जूगु न्ह्यःथनादिल ।