माओवादीया बैठक कन्हय् तकया निंतिं स्थगित

छक्वःपतिकं स्थगित जुयाः वयाच्वंगु एकीकृत नेकपा (माओवादी)या केन्द्रीय समितिया बैठक आइतवाः नं च्वनेमफयेवं सोमवाःया निंतिं स्थगित याःगु दु । थ्व स्वयाः न्ह्यः पार्टी नायः पुष्पकमल दाहाल अमेरिका व न्वकु लिसे प्रधानमन्त्री बाबुराम भट्टराई सार्क सम्मेलनया निंतिं माल्दिभ्स वनेमाःगु धयादिसें बैठक कात्तिक १७ गते छुं ई च्वना सोमवाः तक्कया निंतिं स्थगित याःगु खः ।

बुद्धया जन्मस्थल लुम्बिनीया प्रचार प्रसारया निंतिं धासें अमेरिका झायादीम्ह नायः दाहाल उखेपाखें हे बेलायत जुयाः छुं ई न्ह्यः जक स्वदेश लिहां वःसां नं बैठक सोमवाः न्हिनसिया छताः ईतक्कया निंतिं चीकूगु खः । बैठक सोमवाःया निंतिं चीकूगु धाःसां नं सोमवाः नं वैठक च्वनेगु वा मच्वनेगु अनिश्चित हे दुगु माओवादीया छम्ह नेतां जानकारी ब्यूगु दु ।

थ्व स्वयाः न्ह्यः बैठक न्ह्यायेवं हे वरिष्ठ न्वकु मोहन वैद्यं न्ह्यब्वःगु झिगू बुँदे प्रस्ताव आइतवाःया बैठकय् नायः दाहालं स्पष्टीकरण बिइगु व अनंलिपा झिगू बुँदे असहमतिया प्रस्तावय् केन्द्रीय समितिइ सहलह जुइगु ज्याभुवः क्वःछीनातःगु खः । प्यंगू बुँदे सहमति बिपा सम्झौता जुयाः दलतदथुइ जूगु लिपांगु न्ह्यगू बुँदे सहमति प्रति वैद्य पक्षया असहमति दुगु खः ।

अथेहे नेपाली सेनाया मापदण्ड कथं जनसेनाया व्यक्तिगत समायोजन महानिर्देशनालयसं ख्वीन्यागू प्रतिशत सुरक्षा निकाय व स्वीन्यागू प्रतिशत जनसेना दइगु व उगु ल्वाभः विहीन जुइगु लिसे नियमित ज्याय् ब्वति कायेमफइगु खँप्रति नं वैद्य पक्षया असहमति दु । थ्व स्वयाः न्ह्यः केन्द्रीय समिति बैठकय् महानिर्देशनालयसं सुरक्षा निकाय व जनसेनाया बच्छि बच्छि अर्थात न्यय्गू-न्यय्गू प्रतिशत ल्याः दइगु उकिया नेतृत्व जनसेनां यायेगु ल्वाभः लिसे जनसेना नियमित ज्याय् ब्वति कायेगु निर्णय याःगु खः ।