सर्वोच्चं सरकारया निर्णय कार्यान्वयन मयायेत निर्देशन
माओवादी सभासद् बालकृष्ण ढुंगेलयात आममाफी बिइगु सरकारया निर्णय याकनं कार्यान्वयन मयायेत सर्वोच्च अदालतं निर्देशन ब्यूगु दु । सर्वोच्चया न्यायाधीश ताहिर अली अन्सारीया इजलासं कार्तिक २२ गतेया मन्त्री परिषद बैठकं याःगु आममाफीया निंतिं राष्ट्रपतियात सिफारिस यायेगु निर्णय कार्यान्वयन मयायेत उजं ब्यूगु खः । सभासद् ढुंगेलयात माफी बिइगु सरकारया निर्णय विरुद्ध हत्या याःम्ह उज्जन कुमार श्रेष्ठया तता सावित्री श्रॆष्ठं कार्तिक २४ गते सर्वोच्चय् रिट दायर याःगु खः ।
सर्वोच्चं रिटय् विपक्षी दयेकूपिं प्रधानमन्त्री प्रधानमन्त्री लिसे मन्त्री परिषद ज्याकू राष्ट्रपति ज्याकू लिसे रिट निवेदकतय्त मंसिर ५ गते सहलहया नितिं सःतेगु निर्णय याःगु दु । मंसिर ५ गतेतक्क रिट निवेदक व रिटय् विपक्षी दयेकूपिं लिसे संयुक्त सहलह मयात्तले निर्णय कर्यान्वयन मयायेत उजं ब्यूगु सर्वोच्चया सह प्रवक्ता हेमन्त रावलं जानकारी बियादिल । सर्वोच्चं लिपांगु सुनुवाई मजूत्तले आःया अवस्थाय् तयेत नं उजं ब्यूगु दु । सरकारं आममाफी बिइत राष्ट्रपति दथुइ सिफारिस याःगु इलय् सर्वोच्चं थज्याःगु उजं ब्यूगु खः । मेगु सुनुवाई धाःसा वइगु मंसिर ५ गते जुइगु जूगु दु । रिट विशेष इजलासय् सुनुवाई जुइगु जूगु दु ।
