माओवादीं कब्जा याःगु चितवनया जग्गा लित मबिइगु
द्वन्दकालया इलय् माओवादीं कब्जा याःगु चितवनया जग्गा लित मबिइगु खँ माओवादी निकट संगठनं धाःगु दु । एमाओवादी निकट अखिल नेपाल सुकुम्बासी संघ व अखिल नेपाल किसान संघ क्रान्तिकारीं थौं सुथय् भरतपुरय् पत्रकार सम्मेलन याना कब्जा यानातःगु जग्गा लित मबिगु धाःगु खः ।
कब्जा यानातःगु जग्गाय् सलंसः सुकुम्बासीतय्सं बसोबास यानाच्वंगु दु । भुमिहीन व सुकुम्बासीतया समस्या समाधान मयातले कब्जा यानातःगु जग्गात लित मजुइगु संघया नायः नरबहादुर गौतमं धाःगु दु ।
भूमिहीनतय्गु समस्या समाधान मयासें सरकारं कब्जा जग्गा फिर्ता यायेगु निर्णय याना गलत याःगु धकाः संघया क्रान्तिकारीया सदस्य भूमिश्वर कँडेलं धयादिल ।
चितवनया मङ्गलपुरया १२ विगाहा, विजयनगरया ५ विगाहा,कुरिनटारया १२ विगाहा कठारया ८३ विगाहा, जुटपानीया २.५ विगाहा,पटिहानीया १८ विगाहा जग्गा माओवादी कार्यकर्तातय्सं द्बन्दकालय् कब्जा यानातःगु धाःगु दु ।
