शुक्रवाः संविधान संशोधन जुइमफुत
दलत दथुइ राज्य पुनर्संचनाया निंतिं विज्ञ पुचः दयेकेगु सहमति जुइधुंका शुक्रवाः अन्तरिम संविधानय् झिंछक्वगु संशोधन यायेगु तयारी याःगु खःसां उकिं पुर्णता कायेमफुत ।
एनेकपा (माओवादी)या न्वकु मोहन वैद्य समर्थित सभासद्तय्सं संविधान संशोधन नियमित प्रक्रियां हे यायेमाःगु अडान तयेवं संविधान संशोधन जुइमफुगु खः । संसद सचिवालय् दर्ता जुइधुंकूगु प्रस्ताव संशोधन विधेयकय् सहलह यायेत ७२ घण्टा मालीगु खःसां उगु नियमावली हिइकाः छन्हुं हे संशोधन यायेगु तयारीया विरोध वैद्य पक्षं याःगु खः । आः उगु संशोधन ज्या नियमित प्रक्रिया पाखखें हे वइगु २९ गते संशोधन याइगु ज्याझ्वः दु ।
प्रमुख दलतय्गु दथुइ वंगु कात्तिक १५ गते बहनि जूगु न्हय्गु बुँदे सहमतिइ संविधान निर्माणया झ्वलय् राज्य पुनर्संरचनाया विषयलय् दुगु विवाद ज्यंकेत विज्ञ समूह निस्वनेगु सहमति जूगु ख । विज्ञ पुचः नीस्वनेगु निंतिं सरकारयापाखें कानुनमन्त्री वृजेशकुमार गुप्ता व संघीय मामिला लिसे संस्कृति मन्त्री गोपाल किरातीं व्यवस्थापिका संसद् सचिवालयसं संविधान संशोधन प्रस्ताव दर्ता याकूगु खः ।
थ्व स्वयां न्ह्यः संवैधानिक उपसमितिं राज्य पुनर्संरचना सम्बन्धी विवाद क्वचायेकेगु निंतिं व्यवस्थापिका संसद्पाखें विशेषज्ञ दुथ्यागु पुचः दयेकेगु निर्णय याःगु खः । नेपाःया अन्तरिम संविधान २०६३सं राज्य पुनर्संरचनाया विषयलय् निर्णय यायेत राज्य पुनर्संरचना आयोग नीस्वनेगु न्ह्यथनातःगु खः । अन्तरिम संविधानय् दुगु राज्य पुनर्संरचना आयोग गठनया प्रावधान चीकाः विज्ञ समूह नीस्वनेगु निंतिं सरकारं अन्तरिम संविधान संशोधन यायेत्यंगु खः ।
