१७क्वःगु सार्क सम्मेलन क्वचाल / १८क्वःगु सम्मेलन नेपालय् यायेगु निर्णय
प्रम भट्टराई व भारतया प्रम दथुइ खँल्हाबंला
दक्षिण एसियाली क्षेत्रीय सहयोग संगठन (सार्क)या १७क्वःगु शिखर सम्मेलन शुक्रवाः अड्डु घोषणापत्र जारी यानाः क्वचाःगु दु । अथेहे सम्मेलनं १८क्वःगु सार्क सम्मेलन नेपालय् यायेगु निर्णय नं याःगु दु ।
माल्दिभ्सया अड्डु टापुइ बिहीवाः निसें न्ह्याःगु सम्मेलनय् प्यंगू सहमतिइ ल्हाःचिं तयेगु ज्या नं जुल । उगु सम्मेलनय् प्राकृतिक प्रकोपया इलय् तत्कालिन उद्धार यायेगु, सार्क अनुरुप मूल्यांकनया निंतिं बहुपक्षीय व्यवस्था, सार्क बिज बैंक व क्षेत्रीय मानक कार्यान्वयनया निंतिं सार्क सहमति जूगु खः । सहमतिपत्रय् च्यागू सार्क देय्या विदेश मन्त्रीतय्सं ल्हाःचिं तःगु खः ।
थ्वहे दथुइ मालदिभ्सय् दीम्ह प्रधानमन्त्री डा. बाबुराम भटराईं भारतया समकक्षी डा. मनमोहन सिंह लिसे शुक्रवाः सुथय् नापलानादीगु दु । मालदिभ्सया अड्डुस्थित सांग्रिला रिसोर्टय् जूगु खँल्हाबंलाय् नेपाःया शान्ति प्रक्रिया व निगू पक्षिय हितया बारे सहलह जूगु खः । वय्कपिं दथुइ भट्टराईया भारत भ्रमणया झ्वलय् जूगु बिपा लगायतया सहमति कार्यान्वयन, दोहोरो कर अन्त्य, नेपाःया राजनीतिक दलत दथुइ जूगु न्हय्गु बुँदे सम्झौता, भुटानी शरणार्थीया स्वदेश लिहां वनेगु निंतिं भारतया ग्वाहालि लगायतया विषयलय् सहलह जूगु खँ प्रधानमन्त्रीया निजी सचिवालयं जानकारी बिउगु दु ।
प्रधानमन्त्री भटराईं थः समकक्षी सिंहयात नेपाः भ्रमणया ब्वनापौ नं बिउगु व सिंहं नं नेपाः वयेगु इच्छा प्वंकुगु खः । प्रधानमन्त्री भटराईं शुक्रवाः हे सार्क राष्ट्रया राष्ट्र प्रमुखतलिसे नं सामुहिक नापलाय् ज्या यानादीगु खः ।
