स्वंगू बिस्कं बिस्कं दुर्घटनाय् न्याम्ह सित
डडेलधुरां धनगढीपाखें वनाच्वंगु छगः यात्रुबाहक जीप डोटीया छतिवन गाविसस्थित बुडर लिक्कया रुबस काडाय् दुर्घटना जुया प्यम्ह मनूत सीगु दु । सिपिं मध्ये जीपया चालक जनक कुवरया जूसां मेपिं स्वम्हसिया नं सीमदुनी । घटनाय् निम्ह मिजं व निम्ह मिसा सिगु प्रहरीं जानकारी बिउगु दु ।
से. १. ज. ३४१ नम्बरया जीप सतकपाखें करिव स्वसः मिटर क्वय् पाचाय् कुतुंवना दुर्घटना जूगु खँ प्रहरीं धाःगु दु । जिल्ला प्रहरी ज्याकु डोटीया प्रमुख प्रहरी नायव उपरीक्षक भरत बोहराया कथं क्षमता स्वयां अप्व यात्रुत ज्वनाः वःगु जीप मोडय् यायेगु झ्वलय् असन्तुलित जुया फातापुगु खः । थ्वहे दथुइ बुडरपाखें नेपाल प्रहरी व शसस्त्र प्रहरीया निगू पुच लिसे घण्टेश्वरपाखें छगू पुच उद्दारया निंतिं घटनास्थल थ्यंगु प्रहरीं जानकारी बिउगु दु ।
उखे रुपन्देहीया लमहिसं माइक्रोबस व कार थःथवय् ठक्कर नया जूगु दुर्घटनाय् छम्ह मनू सीगु दु । लु. १. ख. ३९५१ नम्बरया माइक्रोबस व ग. १. च. ३९९१ नम्बरया कार थःथवय् ठक्कर नया जूगु दुर्घटनाय् कार चालक मोहन गुरुङ घटनास्थलय् हे सीगु खः । दुर्घटनाय् मेपिं गुम्ह घाःपाः जूगु दु । अ
थेहे रुकुमया आठविस-२ राडी बजालिक्क घट्टे खेतय् जीप दुर्घटना जुया झिंस्वम्ह घाःपाः जूगु दु । राडी बजापाखें यात्रु ज्वना झुला गाविसया गाँराघाट बजा वयाच्वंगु लु. १. ज. ३९३६ नम्बरया जीप शुक्रवाः सुथय् दुर्घटना जूगु खः । दुर्घटनाय् लानाः डोल्पाया गुम्ह, रुकुमया स्वम्ह व चितवन जिल्लाया छम्ह घाःपाः जूगु दु । घाःपाः जुपिं मध्ये बांमलाक्क घाःपाः जुम्ह गाडी चालक दिलबहादुर कुसारी, निमा बुढा व आनन्द रोकायात थप वासः यायेत जिल्ला अस्पताल सल्ले हःगु दु ।
