राज्य व्यवस्था समितिं गृहमन्त्रीयात सःतल
शान्ति सुरक्षाया वस्तुस्थितीया विषयलय् जानकारी कायेत व्यवस्थापिका संसदया राज्य व्यवस्था समितिं उपप्रधान लिसे गृहमन्त्री विजयकुमार गच्छदारयात सःतुगु दु । समितिं शान्ति सुरक्षा लगायत खुगू विषयलय् जानकारी बिइत धासें आइतवाः सुथय् च्वनीगु मुँज्याय् गृहमन्त्री गच्छेदार, गृह सचिव, जनपथ प्रहरी, सशस्त्र व राष्ट्रिय अनुसन्धान विभागया प्रमुखयात सःतुगु दु ।
समितिया सभापति रामनाथ ढकालया कथं नागरिकया जीउ धनया सुरक्षा व मेमेगु सुरक्षा सम्वन्धि समग्र विषयलय् जुयाच्वंगु ज्याखँया विषयलय् जानकारी कायेगु निंतिं गृहमन्त्री लगायत प्रहरी प्रमुखतय्त सःतुगु खः । आइतवाःया मँज्याय् छुं ई न्ह्यः जनपथ प्रहरी व सशस्त्र प्रहरीया अतिरिक्त महानिरीक्षक पदय् जूगु बढुवा प्रकरणया विषयलय् नं न्ह्यसः न्यनीगु खँ धाःगु दु ।
