संकल्प प्रस्तावया विवाद
राष्ट्रपति विरुद्ध एकीकृत नेकपा माओवादीं हयेगु धकाः बय्बय् जुयाच्वंगु संकल्प प्रस्तावयात सरकार पक्षीय २२ दलं सदनय् हे हयेके मबीगु धकाः याःगु तयारीपाखें सरकार व विपक्षी दथुइ शुरुइ हे तनाव ब्वलनीगु सम्भावना पिकया बिउगु दु । सभामुख सुभाष नेम्बाङं सदनय् संकल्प प्रस्ताव हयेका बी धकाः बचं बिउगु कारणं हे माओवादीं सदन चले याके बिउगु खः । आः वयाः वं धाःगु संकल्प प्रस्ताव सदनय् हयेके बी मखु धाःगुलिं माओवादीं उकियात धोकाया रुपय् काइगु निश्चित खः ।
खतुं माओवादीं सरकार त्वःताः गज्याःगु पलाः ल्ह्वनेगु धकाः तयारी यानाच्वंगु खः व संकल्प प्रस्तावय् सीमित मजू । माओवादीया ग्वसाः मेगु हे दु । तर नं संकल्प प्रस्ताव तकं तयेके बी मखु धकाः धाःगु कारणं पिने खँ तयेगु लागिं माओवादीयात ह्वःताः चूलाःगु दु ।
माओवादीया सरकारं अवकास बिउम्ह प्रधानसेनापति रुक्मांगद कटवालयात वर्तमान सरकारं हानं बहाली यायेगु निर्णय याःगु दु । कटवाल प्रकरण सर्वोच्च अदालत वनाच्वंगु कारणं उकिया बारे संसदय् चर्चा याये मिले मजू धकाः एमाले-कांग्रेसं हे धयाच्वंगु खः । आः अदालतया फैसला मवःनिबलय् हे सरकारं कटवालयात बहाली यायेगु धायेबलय् व नं तप्यंक हे अदालतया मानहानी जू वनी । कटवालयात अवकास बीगु धकाः पुलांगु सरकारं याःगु निर्णय पाय्छि खः वा मखु धकाः कानुनी लिसः बीगु निकाय सर्वोच्च अदालत खः । यदि अदालतय् मुद्दा लानाच्वंगु विषयय् सदनय् खँ ल्ह्वनेगु उचित मखुसा सरकारं उकिया बारे निर्णय यायेगु नं उचित मखु । थज्याःगु खँय् नं सरकार स्पष्ट जुइमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
