सार्क शिखर सम्मेलनय् प्रधानमन्त्री भट्टराईपाखें सम्बोधन
दक्षिण एशियाली क्षेत्रीय सहयोग संगठन (सार्क)या १७क्वःगु शिखर सम्मलेन विहीवाःनिसें माल्दिभ्सया एड्डु टापुइ न्ह्याःगु दु । निन्हुतक्क न्ह्याइगु सम्मेलनया विहीवाः उलेज्या सत्रय् नेपाःया प्रधानमन्त्री डा. बाबुराम भट्टराईं सम्बोधन यानादीगु खः ।
१७क्वःगु सार्क शिखर सम्मेलनयात सम्बोधन यानादिसें प्रधानमन्त्री भट्टराईं शिखर सम्मेलनं पारित याःगु घोषणा कार्यान्वन यायेमाःगु खँय् बः बियादिल । वय्कलं सार्क क्षेत्रया मू समस्या हे गरिवी जूगु न्ह्यथनादिसें गरिवी निवारणया निंतिं सामूहिक पलाः ल्ह्वनेमाःगु नापं सशक्त रणनीति व ऐक्यबद्धताया आवश्यकता दुगु न्ह्यथनादिल ।
थ्वहे दथुइ सार्कया १७क्वःगु शिखर सम्मलेनय् ब्वति कायेगु झ्वलय् माल्दिभ्सया अड्डुइ दीम्ह प्रधानमन्त्री डा. बाबुराम भट्टराईं विहीवाः सुथंनिसें द्विपक्षीय नापलाये ज्या नापं न्ह्याकादीगु दु । प्रधानमन्त्री भट्टराईं सुथय् अड्डुस्थित सांग्रिला रिसोर्टय् श्रीलंकाया राष्ट्रपति महिन्द्रा राजपाक्षलिसे नापलानाःदीगु खः । उगु हे लसताय् वय्कःपिं दथुइ सार्कया सुदृढीकरण, निगू पक्षीय स्वापु विस्तारया लिसलिसे थःथवय्या हित व चिउताःया थीथी विषयलय् सहलह जूगु खः ।
नापनापं प्रधानमन्त्री भट्टराईं बिहीवाः हे भुटानया प्रधानमन्त्री लोन्चेङ जिग्मी योसेर थिन्लेलिसे नं नापलानाःदीगु खः । अथेहे पाकिस्तानया प्रधानमन्त्री युसुफ राजा गिलानी, अफगानिस्ताया राष्ट्रपति हमिद कारजाई व बंगलादेशया प्रधानमन्त्री शेख हसिनालिसे नं वय्कलं ब्यागलं ब्यागलं नापलायेगु ज्याझ्वः दु ।
