ढुंगेल प्रकरणया विरोधय् काग्रेस व एमाले सतकय्
सर्वच्च अदालतं सर्वस्व सहित जन्मकैदया फैसला न्यंकूम्ह माओवादी सभासद बालकृष्ण ढुंगेलयात आममाफी बिइगु सरकारया निर्णय विरूद्ध नेपाली कांग्रेस व नेकपा (एमालें) कडा रुपं प्रतिवाद याइगु जूगु दु । कांग्रेस व एमालें थःगु भातृ संस्थातपाखें सभासद ढुंगेलया मुद्दा लित बिइगु सम्बन्धी सरकारी निर्णय विरुद्ध आन्दोलन नापं न्ह्याकूगु दु ।
कांग्रेसया भातृ संस्था नेपाल विद्यार्थी संघ व एमालेया भातृ संगठन अनेरास्ववियुं निर्णय लित कायेगु माग यासें विहीवाः सुथय् करिब बाघौ येँया थीथी क्याम्पस न्ह्यःने चक्काजाम यात । उमिसं सुथय् ८:३० निसें ९:०० बजे तक्क येँया क्याम्पस न्ह्यःने प्रदर्शन याःगु खः । अथेहे घण्टाघरस्थित त्रि-चन्द्र क्याम्पस न्ह्यःने विरोध जुलुस पिकायेगु ज्या जूगु खँ नेविसंघं धाःगु दु ।
उकथं हे माआवादी सभासद ढुङगेलयात आममाफी मबीत माग यासें एमाले विद्यार्थी संगठन अनेरास्ववियुं विहीवाः सनिलय् राष्ट्रपति डा. रामवरण यादवयात नापलानाः ज्ञापनपौ लःल्हायेगु ज्याझ्वः दुगु जानकारी बिउगु दु । मंगलवाः च्वंगु मन्त्री परिषदया मुँज्यां ढुंगेलया मुद्दा लित कायेगु निंतिं राष्ट्रपतियात सिफारिस याःगु खः ।
थ्वहे दथुइ एनेकपा (माओवादीं) धाःसा युद्धकालया मुद्दा थनेत स्वःगु धासें च्यूताः प्वंकूगु दु । माओवादीं युद्धकालया फुक्क मुद्दा तयेगु खःसा उगु इलय् सरकारय् च्वंपिं प्रधानमन्त्री व मन्त्रीत लिसे फुक्क सुरक्षा निकायया अधिकारीत जेल च्वनेमाःगु धाःगु खः । नापनापं माओवादीं युद्धकालया मुद्दा ल्ह्वंसा मेलमिलाप व शान्तिया पलेसाः थप ल्वापु व अविश्वास हइगु ख्याच्वः बिउगु दु ।
